Pan ta e producto cu mas demanda tin bao di clientenan di FPNC

Gianaika van der Biesen:

ORANJESTAD (AAN)- Director di Fundacion pa Nos Comunidad, FPNC, a referi na e alimentonan cu mas e clientenan ta pidi. El a indica cu e producto cu mas demanda tin, ta pan.

   “Nos tin pan cu tur dia nos ta reparti, y e ta wordo pidi hopi. Nan mes ta bin busca of nos ta reparti na cierto adresnan cu e ta wordo hiba.

   Pan ta e alimento basico cu nan ta pidi, y nos no tin un supermercado cu bo ta drenta y scoge kico bo kier; tur pakete ta bin mescos, nos ta depende gran parti di nos dunadornan, di e wholesales cu tambe ta haci posibel cu tin biaha nos ta haya productonan, tambe na nos comunidad cu semper ta yuda nos.

Mi sa cu ora cosnan ta bira dificil na Aruba, e ta bira tambe dificil pa nos dunadornan tambe por duna nos mes hopi, cu nan tabata duna nos anteriormente. Anto, esey tambe ta haci  cu tin biaha e pakete ta bira mas chikito.

   Pues, mas donacion nos haya mas nos por duna e luna ey.

   Banda di e pakete di alimento y higiene, tin e articulonan pa baby cu tambe ta hopi pidi. Nan ta haya bruki, lechi, entre otro. Tin biaha e fundacion ta haya donacion cu nan por haci compras di esaki, y cu esey nan ta purba di suaviza y alivia e famia aki. Esaki ta bay pa edad di 0-3 aña y kico ta e producto cu e mucha tin mester di dje. Asina Gianaika van der Biezen a informa.