Segun señor Frans Ponson di CUA:
ORANJESTAD (AAN): Despues di un evento di Comerciantenan Uni, e tema di vivienda, tabata riba agenda na unda cu a keda comproba tambe cu esaki ta un di e preocupacionnan mas grandi den nos comunidad. Segun señor Frans Ponson di Sindicato CUA, loke a wordo comparti den e evento aki, ta cu hopi ciudadano ta acudi pa ayudo relaciona cu vivienda, loke ta mustra cu e problema ta real y urgente.
Den e discusionnan, a sali na cla cu Gobierno di Aruba mes a reconoce cu pa hopi aña largo no tabatin suficiente asignacion di tereno, loke a contribui na e situacion actual. Segun e, pa por atende e demanda creciente, lo mester disponibilidad di mas tereno, pero tambe un cambio den e manera con nos ta mira desaroyo di vivienda.
Un punto importante cu a wordo treci pa dilanti ta e cambio den composicion di famia. Mientras cu anteriormente un hogar promedio tabata consisti di mas o menos 4 persona, awe esaki a baha significativamente, cu famianan cu ta haya promedio solamente 1.8 mucha. Esaki kiermen cu e necesidad pa casnan grandi no ta mescos cu antes, habriendo e posibilidad pa construi vivienda mas chikito riba terenonan mas compacto.
Sinembargo, pa logra esaki, señor Ponson a remarca, lo mester haci diferente cambio den politica y planificacion urbano. E sentimiento general ta cu Gobierno di Aruba ta consciente di e magnitud di e problema, pero e momento a yega pa pasa for di reconocemento di e problema di vivienda pa tuma accion concreto pa soluciona e problema di vivienda. Vivienda ta sigui un tema di hopi interes pa comunidad, y hopi hende ta spera cu decisionnan rapido y efectivo lo wordo tuma.
