Un Minister cu 5 cartera, pero ni un solo recibo

Parlamentario Xiomara Maduro

ORANJESTAD (AAN): Den su discurso durante e reunion publico cu Minister Gerlien Croes, Parlamentario Xiomara Maduro a trece dilanti cu Pueblo ta sumamente preocupa cu Minister Gerlien Croes, ya cu e mandatario te ainda no por mustra un simpel recibo di su “biahe di trabou” den avion priva.  

-5 cartera, mas responsabilidad

E parlamentario ta enfatisa cu e minister ta encarga cu 5 cartera y esaki ta trece hopi poder cun’e, y cu gran poder ta bin gran responsabilidad. “Pa e motibo ey, un minister cu 5 cartera, no por permiti su mes pa keda sin duna claridad y keda sin presenta e recibo di pago pa su biahe di trabou den avion priva” Maduro ta expresa. 

-Patronchi peligroso

“Sinembargo nos ta mira un patronchi hopi peligroso di e minister, di cambia version, desvia atencion, culpa oposicion y presenta e cuestionamento legitimo como si fuera ta persecucion politico e ta,” e parlamentario ta splica. 

-No kier mustra recibo

Parlamentario Maduro ta cuestiona: “Si e biahe tabata pa trabou, ta con dificil e por ta pa e minister pa mustra e recibo y caba cu tur e discusion? Pakico Minister Gerlien ta insisti pa no contesta pregunta riba e biahe cu avion priva? Ta kico ta stroba e minister pa mustra e recibo?

-Pueblo kier transparencia

Segun Maduro, Pueblo kier claridad y no ta pidi pa drama. Pueblo merece miho, ta pidi transparencia y consistencia. Pueblo merece lidernan cu ta comprende cu poder publico ta bin cu responsabilidad y no solamente privilegio. 

Un minister cu ta maneha 5 cartera, tin poder y responsabilidad grandi, y cune no por permiti su mes e luho pa keda sin mustra pueblo e recibo pa su biahe di trabou den avion priva. Cada dia cu Gerlien keda sin contesta, e ta bezig ta debilita democracia na Aruba, Parlamentario Maduro ta bisa na final.