Premier Rob Jetten di Hulanda a yega Aruba

ORANJESTAD (AAN): Diamars atardi, Premier Rob Jetten di Hulanda a yega Aruba,

y su delegacion a wordo ricibi na aeropuerto pa Prome Minister di Aruba, Mike Eman, hunto cu representantenan clave, marcando un comienso solido di un programa intensivo enfoca riba dialogo, resultado y interes di Aruba.

Durante e bishita, Gobierno di Aruba a tuma e liderazgo den e dialogo cu e delegacion Hulandes, poniendo enfasis riba desaroyo economico, fortalecimento di sector empresarial y posicion strategico di Aruba den Reino. Den e encuentro cu sector priva na VNO, Aruba a mustra su ambicion pa sigui crece como un socio dinamico y confiabel.

   Prome Minister Jetten a tene un audiencia formal cu Gobernador Alfonso Boekhoudt, sigui pa un reunion oficial entre Prome Minister di Aruba y Hulanda na Bestuurskantoor cu a sirbi como un plataforma pa Gobierno establece su prioridadnan y defende interes nacional cu claridad y determinacion. E dialogo a enfoca riba cooperacion rasonabel, desaroyo sostenibel y reenforsa nos autonomia den e structura di Reino.

   E programa a continua cu un encuentro cultural y un cena oficial cu Conseho di Ministro di Aruba y Parlamento di Aruba, unda Gobierno a sigui guia e dialogo riba tema clave pa futuro di Aruba y su pueblo.  Aruba ta reafirma cu e bishita aki ta un refleho importante di su rol activo y lider den Reino Hulandes, unda Aruba ta defende su interes pa progreso, profundisa relacion, stimula cooperacion basa riba respet mutuo y igualdad pa beneficio di Aruba y Reino Hulandes.