E Fase 2 di e Trayecto “In the picture” a cuminza pa pone teoria den practica

Marceylaine Paskel, PR-DAS:

*E meta ta pa clientenan di bijstad pasa pa mercado laboral 

ORNJESTAD (AAN)-- E Fase 2 di e Trayecto “In the picture” a cuminza. Asina Marceylaine Paskel, Relacionista Publico di Departamento di Asunto Social (DAS), a duna di conoce den entrevista cu Matutino DIARIO.

Den esaki Stichting JA IK Aruba ta guia e clientenan na conoce diferente compania, pero e parti mas principal ta cu nan ta bay pone e teoria den practica, PR Marceylaine Paskel a splica.

“Cu esaki nos clientenan lo cuminza stage, di 1 pa 31 di Juni, unda nan lo conoce structura, nan lo cuminza custumbra cu e mercado laboral. Ban pon’e positivamente, nan ta bay keda unda nan lo bay”, Paskel a exclama.

El a splica cu esaki ta e mesun grupo cu a termina e prome fase.

“Mi kier a bisa si, cu mi kier a gradici Stichting Ja IK Aruba y sigur tambe na DPL, cu ta forma parti di e trayecto aki, cu ta un trayecto transformativo cu lo cambia e bida di e clientenan, y esaki ta locual DAS ta para p’e firmemente. Y nos ta sigui crea e bienestar pa henter e comunidad. Sigur tambe, un elogio pa nos profesionalnan, den DAS, cu ta traha incansable pa semper t’ey”, Marceylaine Paskel, Relacionista Publico di DAS, a subraya.