E gran Ruben Mansur a fayece na edad di 93 aña

ORANJESTAD (AAN): Riba Diamars atardi a drenta e noticia cu un comerciante y personahe conoci den comunidad di Aruba, esta Ruben Mansur a fayece, y apenas recien el a cumpli 93 aña di edad.

   Ruben ta yiu di Elias Mansur, y su mama Damia Mansur.  Ruben ta ruman homber di fundador di DIARIO, esta Jossy Mansur (d.f.m.).  El a casa cu Erica Arends, y ta conoci tambe como tata di conocido ciudadanonan Eric, Ilienne, Bincho, Carlo, y Izaira Mansur.

   Despues di a studia na Spring Hill College na Merca, el a regresa Aruba y traha cu su tata den diferente empresa riba e isla, y esaki a yude obtene aun hopi experiencia como comerciante, cu a yude bira exitoso pa resto di su bida ora el a crea y maneha su mesun negoshinan.

   Fuera di esey, riba tereno social e tabata hopi envolvi den Asociacionnan riba e isla, y tambe ta duna apoyo na instancianan caritativo, y e mes tabata activo den tur esey.

   Ruben conoci como e homber cu semper ta alegra y un sonrisa riba su cara.  Na famia grandi di Ruben, henter famia Mansur, DIARIO ta extende su mas profundo palabra di condolencia.