Exitoso Donkey Fair pa festeha 25 aniversario di Sanctuario di Burico

ORANJESTAD (AAN): Un cantidad di persona local, incluyendo turista a acudi Diadomingo pasa na Sanctuario di Burico na Santa Lucia, pa asina festeha e di 25 Aniversario di e Fundacion aki.

   Nan a haci esaki den un forma di Celebracion di Donkey Fair, cu ta un evento estilo Feria y Mercado, unda por a cumpra cos dushi, cuminda, mata, laga muchanan pinta cara, y tambe interactua cu e buriconan.  Tambe tabatin arte pa cumpra, y hopi articulo traha na man, y hopi mas.

   Varios turista cu e momento ey a pasa dal un bishita, a adopta algun burico tambe pa asina yuda cu su alimentacion

   Tabatin un monton di boluntario cu a pasa duna nan colaboracion, y a haci esey danki na diferente compania local cu a suministra producto pa haci e evento posible.

   E actividad a dura 5 ora largo, y sigur e organizadornan ta contento cu e gran publico cu a haci acto di presencia.

   DIARIO na su turno ta felicita e Sanctuario di Burico pa e bon trabao ultimo 25 añanan.