Te despues cu concepto di Rijkswet HOFA ta wordo manda Hulanda e ora Parlamento a hay’e concepto pa lesa

Dangui Oduber:

• Convenci cu Gobierno NO tin respet pa pueblo
• Un total falta di consensus aki 

ORANJESTAD (AAN): Parlamentario Dangui Oduber a lansa un critica fuerte Diaranson contra e maneho di e coalicion AVP-Futuro, declarando cu e gobierno aki NO tin ningun respet pa e pueblo di Aruba.

   Segun Oduber, e forma con e concepto di e Rijkswet HOFA a wordo maneha, mandando esaki Hulanda prome cu Parlamento di Aruba por a tuma nota, ta un falta di respet grave pa e organo di mas halto di nos democracia.

   Bypass di nos Democracia: E parlamentario Oduber a expresa cu e tema di Rijkswet HOFA ta un asunto fundamental cu un gobierno no por “bypass’’ Parlamento sin mas. Segun e parlamentario, e ley aki lo kita nos Libertad, lo kita nos Status Aparte y lo manda nos bek mas cu 50 aña atras.

   "Nos ta biba den un pais liber, nos Status Aparte a percura pa progreso y nos no por permiti pa un grupito di politico cu no ta kere den nos pais bay entrega nos libertad y autonomia," e parlamentario a splica. Ademas, e parlamentario a expresa cu e problema mas grandi ta e echo cu e rijkswet aki ta kita derecho di Parlamento, unda un parlamentario NO por aproba, desaproba, ni trece ningun cambio den e ley. Oduber ta lamenta cu e gobierno di AVP-Futuro a falta respet pa pueblo door di no manda e concepto pa Parlamento prome, pa e wordo revisa y cambia prome cu el a bay Rijksministerraad na Hulanda.

   ‘Mosterd na de Maaltijd’:  Hecho ta cu Parlamento a keda afo! Despues cu e concepto di e Rijkswet HOFA a wordo manda Hulanda, Parlamento di Aruba finalmente a ricibi e documento e siman aki pa "wak y lesa".

   Oduber a categorisa esaki como "LAAT" y un falta di respet total. Segun Oduber, esaki ta “mosterd na de maaltijd,” mirando cu e Conseho di Ministro di Hulanda ya a aproba e concepto caba. "Parlamento di Aruba NO por trece NINGUN cambio mas den e Rijkswet HOfA aki, y esey ta algo cu NOS no ta bay acepta," Oduber a subraya.

   Falta di Consenso y logica financiero: E Parlamentario a enfatisa cu no tin ningun tipo di consenso pa e ley aki: (*) 10 miembro di Parlamento ta abiertamente contra. (*) Tur sindicato na Aruba ta contra. (*) Mas di 10.000 ciudadano a firma nan rechaso contra e Rijkswet HOFA.

   Ademas, e Parlamentario a cuestiona seriamente e posicion di politiconan manera Gerlien Croes y Geoffrey Wever ,kendenan kier pa nos celebra cu nos ta biba den un pais liber, pero na mesun momento kier entrega y bende nos pais pa un “sakito di placa”. Oduber ta haya insolito cu nan kier entrega nos finansa publico y nos autonomia financiero, siendo cu aki dos aña caba e debe di nos pais lo baha bou di 50%!

   Oduber a remarca cu Aruba ya tin un supervision financiero ancra den e Landsverordening Aruba financieel toezicht (LAft). Aruba ta cumpliendo debidamente cu tur e normanan financiero y ta pagando su debenan cu Hulanda. Bisando esaki, no tin ningun motibo valido ni ningun hustificacion pa acepta e Rijkswet HOFA. Ta tristo cu e gobierno aki, hunto cu su parlamentarionan, kier bende nos pais di e forma aki. Libertad di un pais ta algo sagrado y no por wordo negocia.

   Aruba ta un pais liber desde aña 1986 y, danki na e libertad aki, nos isla a logra prospera y progresa. Nos tin awo, e libertad pa tuma nos propio decisionnan, e libertdad pa vota den nos parlamento, e libertad pa uza nos fondonan manera nos ta desea. “Tur esaki ta wordo kita for di nos cu e Rijkswet HOFA,” Oduber a conclui.

   E pregunta principal ta keda: Di con Aruba mester acepta e Rijkswet HOFA?