Parlamentario Maduro ta cuestiona dobel standard di Minister Wever

ORANJESTAD (AAN): E siman aki, Parlamentario Xiomara Maduro ta critica Minister Geoffrey Wever pa su “dobel standard politico” den e caso Avestruz.

   Segun Maduro, Wever tabata hopi firme den 2021 ora el a papia riba e caso di Benny Sevinger. Na e momento ey, el a manda un carta habri pa Mike Eman bisando cu Benny no por huramenta como Parlamentario, ya cu esaki lo ta “un mancha scur den historia politico di Aruba” y un mal ehempel pa nos hobennan. Pero awe, cu castigo a cay pa Benny den e caso di Avestruz, Minister Wever ta scoge pa keda keto y no duna su opinion riba e caso.

   Pa e motibo aki, Parlamentario Maduro ta puntra: Unda e mesun liderazgo di Wever a keda? Ta pasobra e ta bou di e hala di Mike Eman awe, e ta den silencio? Of ta paso e tin miedo di perde sosten den Parlamento?

   “Compasion” no ta rason pa keda keto! Durante un reunion na Parlamento, Wever a bisa cu e no kier duna su opinion, pasobra e tin compasion pa e famia. Pero Parlamentario Maduro ta bisa cu compasion no por ta un rason pa un minister keda keto y no duna su opinion riba un caso cu a causa asina hopi daño na comunidad. E Parlamentario ta remarca cu e caso Avestruz a perhudica hopi hoben cu a warda aña largo pa un tereno.  “Net Minister Wever, cu a campaña bou di e young professionals, awe no tin opinion? Pueblo tin derecho di sa kico e Minister ta pensa awor cu hues a duna e sentencia final.” Maduro ta expresa.

   Pa e Parlamentario di MEP, ta e deber di Minister Wever y su coleganan den gobierno pa duna claridad, asumi nan responsabilidad y mustra con lo evita cu situacionnan asina por bolbe ripiti. Maduro ta conclui: “Bo no por ta fuerte contra Benny den 2021 y keto den 2026 awo cu castigo a cay den caso Avestruz.”