Fundacion Movemento Ta Bida a renoba statuto

ORANJESTAD (AAN): Fundacion Movemento ta Bida (FMTB) tin e placer di anuncia cu despues di 15 aña a haci cambio di su statuto.

Danki na Oficina di Notario Helmeyer pa nan guia y consehonan. FMTB ta contento cu e statuto ta mas amplio y ta duna espacio pa haci mucho mas. No solamente ta promove e beneficionan di actividad fisico na e adulto mayor, pero motiva desaroyo personal, brinda sosten social, emocional y mental.

FMTB por duna curso y tene charla pa esnan cu ta bay baha cu Pensioen, cual ta encera e parti holistico na unda e adulto mayor mester tin un proposito y balansa cu por enrikece su bida como pensionado. Den corto tur loke ta encera “Active Aging”. Fuera di esaki un otro cambio importante ta cu FMTB a coregi e palabra Movemiento pa movemento cual ta un coreccion cu a bin di parti di Sr. Todd Dandare. Nan ta aprecia masha hopi mes.

E cambionan aki a tuma tempo pero den 2025 a duna prioridad pa termina esaki. Cu e Statutonan actualisa nos trabou como FMTB por sigui mas rapido y ta brinda mucho mas posibilidad pa desaroyo di nos Adulto Mayor. Mester bay cu tempo.

E programa di 2026 ta yen di actividad atrobe pa nos Adultonan Mayor na diferente districto. Semanalmente tin encuentro nan unda cada grupo ta responsabel pa e actividadnan. Na e momento aki nos tin 10 grupo cu ta cay bou di FMTB y 22 grupo independiente cu tin contacto cu FMTB. Semper FMTB ta cla pa yuda y duna conseho na cualke grupo cu tin pensa pa cuminsa haci algo semanalmente hunto cu “nan” grupo. E oficina di FMTB a situa den e edificio di IBiSA na Eagle. Otro actividadnan cu ta keda popular y ta ripiti anualmente ta: cana den caturalesa, Fysio Fit, cursonan (e aña aki tin Arte Creativo), Hofi di Bario unda por yuda den hofi cu plantacion y cosecha, haci limpiesa, muha mata etc., weganan deportivo Jani Brokke (mas cu 10 deporte pa adulto mayor), Song Festival 60plus y Fundraising (Bingo). E aña aki lo tin un Conferencia na luna di October y e Show Cultural entre generacion nan. Tur e gruponan di Adulto Mayor (for di San Nicolas te cu Noord) manera ariba menciona por participa den e Show aki. Y no por lubida Canto di Alegria na December unda ta pasa na diferente cas pa canta y trece alegria na nos grandinan.

Nan forza ta nan boluntarionan. Sin e boluntarionan, nan no por a yega unda nan ta awe. Por ultimo FMTB ta gradici su miembronan di directiva pa nan tempo y trabou como boluntario. Si tin companianan cu ta desea pa FMTB duna un presentacion na nan empleadonan cu ta bay baha cu pensioen por ehempel, yama nos pa un cita.