Lo bin control y sancionnan fuerte pa esnan cu ta haci maluso cu permiso di trabao

Minister Arthur Dowers ta enfatiza:

• Esnan cu ta haci negoshi di nan mes regla esaki pa hende di afo 

ORANJESTAD (AAN) Minister di Husticia, mr. Arthur Dowers, den entrevista cu DIARIO a indica cu e posibilidad tey cu gobierno ta bay reduci e cantidad di personanan cu ta bin di afo pa busca trabao na Aruba, den e proceso di regularizacion.

   “Nos a constata cu ta casi imposibel pa haya koki, carnicero, y cleaners. Pa e funcionnan aki semper tin e posibilidad, si tin vacature, por solicita pa permiso, y por bin na remarca p’e si e persona cumpli cu tur rekisito. Personanan cu tin estudio academico, un HBO’er, etc., tambe tin e posibilidad pa por aplica pa permiso”, e dignatario a subraya.

  Segun Minister Dowers por a constata cu tin hende cu ta haci mal uso di e sistema di permiso. “Y no necesariamente cu nan mes, mester di un trahado, ta djis nan kier firma pa hende pa nan trece hende di afo, y esey no ta e intencion”, Minister Dowers a señala.

   E intencion ta cu e hendenan mester wordo acopla na e mercado laboral, pasobra e mester bin akinan cu un meta, cu ta contribui cu nos economia,  y na su bienestar tambe, pa por tin un bida digno”, Dowers a indica.

   E dignatario a señala cu e sa cu tabata tin y tin ainda negoshi riba e asunto aki, y otro aña gobierno ta bay hopi mas streng cu e controlnan riba esaki y e ta spera cu hendenan ta conciente cu tin consecuencianan severo tambe, pa esnan cu ta keda haci maluso di e sistemanan aki pa trece hende di afo. Cu prison ta yen ta berdad, pero esey no ta nifica cu nos no por pone sancionnan hopi fuerte y multanan hopi halto pa hendenan sinti cul, enberdad, loke nan ta haci no necesariamente, ta actonan legal”, Minister di Husticia Arthur Dowers a declara.