Prijs di cuminda por subi cu 37 porciento

The content originally appeared on: Diario

Produccion local di cuminda ta exigi tur atencion awor — *Banco Mundial ta papia di un catastrofe humano na Ukraine — *Advertencia a wordo lansa na tur pais cu debe nacional pa paga 

ORANJESTAD(AAN)—Hamber y mas hamber ta e unico seguridad cu Banco Mundial por presenta na comunidad internacional, manera su Presidente a trece dilanti.

Banco Mundial a uni su mes na e advertencianan cu a wordo lansa pa e Fondo Monetario Internacional, manera DIARIO a publica siman pasa.

Informacionnan cu ta alcansa mundo cada rato ta bira mas serio y ta papia di reformanan sumamente serio cu gobiernonan mester tuma na consideracion den un situacion cu ta empeora.

Pa comprende e gravedad di e situacion mester bolbe na Ukraine cu ta un fuente mundial di alimenta.

Na e pais cunukeronan a ocupa un lugar importante riba tereno economico. Agricultura a haci cu Ukraine a bira un productor importante di cuminda pa mundo, cu por a ricibi grano, cu ta wordo uza pa produccion di pan.

Produccion di cuminda ta un base economico importantisimo pa Ukraine, caminda Rusia a destrui Un Miyon di hectare di tereno cu tabata wordo uza pa produci cuminda pa mundo.

Na e momento aki tur produccion di cuminda di Ukraine, loke a resta pues den e situacion horibel cu e pais ta conoce, ta wordo uza pa e poblacion cu a keda atras y pa e ehercito cu mester lucha.

DIARIO a busca informacion mas directo di e produccion di cuminda pa mundo dor di Ukraine.

Galiña ta un fuente di entrada enorme pa Ukraine cu ta produci maishi pero tambe carni di galiña cu ta wordo procesa tambe.

E guera a nifica cu produccion di cuminda a bira produccion di hamber na cantidad di pais na mundo.

Hamber cu ta bira cada momento un problema mas serio segun Banco Mundial, cu a confirma e informacionnan cu DIARIO a presenta di e Fondo Monetario Internacional.

Ta wordo culcula cu e prijs di cuminda lo ta asina halto, cu e lo ta impagabel pa e grupo grandi di personanan cu ya ta biba den pobresa.

E dirigentenan di World Bank a indica ayera cu e problema serio na hopi pais ta, cu mester atende cu un problema cu no a origina dor di gobernacionnan local cu awor mester busca solucion pa problema serio cu nan ta afecta.

E situacion ta mas serio pa paisnan cu no tin produccion propio di cuminda y tambe mester paga debenan nacional, manera World Bank a trece dilanti.

E informacionnan ricibi ta mustra cu na Aruba enfasis mester wordo pone awor riba produccion di cuminda local den un situacion sumamente severo.

Plannan di Gobierno for di 2021 tabata indica cu e sector di produccion di cuminda ya a haya atenciom y entre otro agricultura na Aruba a conoce un prijs special pa awa pa asina por produci cuminda.

E situacion mundial ta exigi awor pa un plan local di emergencia wordo crea pa produccion di cuminda wordo aumenta.

DIARIO ta sigui tene Aruba informa di situacionnan alarmante cu ta presenta nan mes y manera World Bank a trece dilanti ta soprende tur pais cu no por a prepara nan mes pa e catastrofe humano mundial cu e crisis Ukraine a produci.