Siman a habri cu 4495 caso activo di Covid-19, mientras cu diasabra a surpasa 5 mil caso

Despues di basta dia a raporta un fayecimento

ORANJESTAD (AAN): Resumen di diadomingo ta indica cu 1417 persona a recupera y un total di 524 caso nobo di COVID-19 a keda registra di cual 101 ta no-residente.

E cifranan aki ta representa un 'Positivity rate' bou di residentenan di 65%.

E cantidad di casonan activo di COVID-19 ta 4494 y cantidad di fayecidonan relaciona cu COVID-19 a aumenta na 182. Forsa na famia di e fayecido.

Datonan ta ilustra casonan nobo di COVID cu un averahe semanal di 845 caso pa dia y un averahe di 'positivity rate' semanal di 63% pa dia.

Actualmente na Aruba tin 17 persona interna debi na COVID di cual den ICU tin 4 persona y riba piso general tin 13.

Na Colombia tin actualmente 3 persona den ICU y ningun (0) riba piso general.

Riba diasabra, 69 persona a recupera y un total di 700 caso nobo di COVID-19 a keda registra di cual 142 tabata no-residente.

E cantidad di casonan activo di COVID-19 riba diasabra tabata 5387.