Ultimo fase di formacion ta tumando lugar y pronto Aruba lo tin un gobierno solido pa e proximo 4 aña

Prome Minister Evelyn Wever-Croes: - *reunionnan cu Departamentonan di Gobierno lo cuminsa e siman aki

ORANJESTAD (AAN): Yegando mas cerca di formacion di un gobierno solido y cu mayoria den Parlamento, dialuna 30 di augustus e reunionnan cu stakeholders den nos comunidad a sigui cu Formador Evelyn Wever-Croes y e equiponan di Partidonan MEP y Raiz riba e temanan social y financiero. Despues di e reunionnan, e institutonan invita a duna nan declaracion na prensa.

Prome Minister a indica cu nan a reuni cu 115 stakeholders y cada un di e reunionnan aki tabata sumamente interesante na unda cu hopi puntonan importante a wordo treci padilanti. Ainda falta algun stakeholders pa reuni mientras cu e reunionnan cu e diferente departamento di Gobierno. Pero nan ta den e ultimo fase di formacion y pronto Aruba lo tin un gobierno solido pa e proximo 4 aña.

"Mi ta gradici cada stakeholder y tambe prensa pa a duna di nan pa reuni cu nos y na prensa pa tur dia tabata presente pa e declaracionnan treci dilanti”, Prome Minister Evelyn Wever-Croes a duna di conoce.  

Pa Fundacion Centro Pa nos Grandinan Kibrahacha, Director señor Jeffrey Matos a duna su declaracion na prensa. Sr. Matos a indica cu e Fundacion ta satisfecho cu Aruba ta bay haya un Minister pa atende cu e cartera di nos adulto mayornan cua lo ta na beneficio di e grupo aki den nos comunidad. Den e reunion, Fundacion Kibrahacha a elabora riba e diferente proyectonan cu nan a realisa, cu tin den ehecucion como tambe e proyectonan cu tin den nan plannan. Un fundacion cu pa 36 aña ta brinda nos grandinan di tur districto na Aruba un centro di actividad ofreciendo servicio di transporte y hunto cu stakeholders ta organisa diferente evento di informacion riba diferente tema entre otro salud y technologia. 

Pa FCCA, señora Julie Wever, Director Technico y Comercial a duna declaracion na prensa. Sra Wever a duna di conoce cu e topiconan cu FCCA a trece dilanti a cay na bon agrado y a logra trece nan puntonan cardinal padilanti pa loke ta trata vivienda pa nos comunidad. Sra Wever a expresa cu ta hopi duidelijk cu mester traha mas hunto riba diferente topico riba e parti social y con pa traha pa logra barionan cu ta fit den nos comunidad y cu tin tur facilidad den dje teniendo cuenta cu flora, fauna y medio ambiente y brinda pueblo casnan di calidad. 

Pa Stichting Rancho, cu tin 11 aña di existencia, señor Cliffort Rosa a duna su declaracion y e menciona e puntonan cu nan a elabora den e reunion cu Formado. Sr. Rosa a elabora riba e programa Celebrando 200 Aña di Oranjestad cua programa a cuminsa aña pasa. E Stichting ta pidi e colaboracion di Gobierno, departamento y stakeholders pa asina por encamina e programa aki te cu 2024. Conserva historia y cultura di Oranjestad especial di Rancho tawata un punto di enfoke. E fundacion ta pidi Gobierno pa pone mas atencion na e protocolnan di Unesco y riba e SDGs especialmente number 17. 

Pa APFA, señora Shelia van Veen, Director, a duna su declaracion na prensa bisando nan tawata tin un bon reunion cu Formador y ekipo na unda cu e delagacion di APFA a haya varios pregunta tambe di parti di e ekipo di formacion. APFA a duna un presentacion cortico y interesante tocante e diferente desaroyonan di e fondo di pensioen splicando tocante e inversionnan y posicion financiero di e fondo. A elabora riba e tema di flexibilisacion pa brinda e participantenan mas escogencia den nan pensioen.