WTTC ta mustra cu Aruba ta den top 5 paisnan cu a recupera full caba di turismo

The content originally appeared on: Diario

ORANJESTAD (AAN): Pa mas di 30 aña, e organizacion di World Travel & Tourism Council (conoci como WTTC) a haci investigacion riba e impacto economico di viahe y turismo den 185 pais rond mundo, y ta atende hopi asunto relaciona cu esaki.

   En realidad e ta un foro pa e industria di viahe y turismo.  E ta consisti di miembronan di e comunidad mundial di negoshi, y ta traha cu Gobiernonan pa asina concientiza tur hende riba e industria importante aki.

   Awor cu e Pandemia a finaliza, recien nan a caba di haci analisis di recuperacion turistico.

   Den e di 21 Cumbre Anual di WTTC Council teni na Filipinas, a mustra cu e prome cinco paisnan cu a recupera mihor den turismo ta Costa Rica, Aruba, Republica Dominicana, Jamaica, y Pakistan.  Mexico ta na di seis lugar.

   E hecho cu Mexico a cay na di seis lugar a sorprende par di hende, como cu semper e ta un magnet principal pa atrae turistanan Mericano y di otro pais.  Sinembargo Mexico desde fin di 2021 a cuminza exigi visa di turistanan di Ecuador y tambe di Brasil.

   WTTC su analisis ta mustra cu e economia danki na viahe y turismo a dal un buelta y ta riba e caminda pa recupera completamente.  Porfin awor despues di casi 2 aña cu viahamento a wordo paraliza, awor ta mira cu yen positivismo con viahamento a sigui bek, y tur esaki segun regla y guia cu ta sigura e bon salud di e pasaheronan.

   Pa awor, WTTC ta sigui mira cu crecimento di viahe y turismo rond mundo lo sigui bay den direccion positivo.