Diferente hende incluyendo dos muhe deteni pa traficacion di droga

Razzia tabata casi na ordo di dia desde comienzo di December

• En total a detene 6 persona
• Razzia teni na Bushiri, Calbas, Pavia, y Shiribana 

ORANJESTAD (AAN): Autoridadnan hudicial na Aruba ta sigui cu nan racha di razzia, pa asina sigui ocasiona deuk enorme den e forma operacional di esnan meti den baho mundo riba e isla.

   Ya for di prome dia di December caba, autoridadnan hudicial hunto cu Ministerio Publico a tene un racha di razzia cu detencion a tuma lugar. Esaki den cuadro di un investigacion pisa cu e inspectornan di Unit Narcotica di Cuerpo Policial di Aruba a realisa.  Nan mes ta convenci cu e accionnan aki a termina exitoso cu sla duro pa baho mundo.

   December a habri cu entrada hudicial na un adres den Bushiri pa bendemento di droga. Den e razzia inespera aki na Bushiri, autoridad hudicial a detene un hende homber di inicial J.L.P. di 33 aña di edad y naci na Hulanda. Durante e buskeda a confisca arma di candela cu yen municion. Tambe a haya cargamento di marihuana y cocaina.

   Relaciona cu e mesun investigacion Unit Narcotica a sigui despues riba un otro dia, pa un otro razzia na casnan situa e.o. na Calbas, Pavia y Shiribana. A detene dos hende muhe di inicial M.C.K. di 36 aña di edad naci na Aruba y C.M.R.P. di 42 aña di edad naci Republica Dominicana.

   Segun Unit Narcotica, tambe nan a detene tres hende homber di inicial S.A.F. di 58 aña di edad naci na Aruba tambe un otro hende homber di inicial E.A.T. naci na Aruba di 45 aña di edad y A.J.L.L. naci na Aruba di 33 aña di edad.

   Durante buskeda na e adresnan aki, a bin topa cu cantidad considerabel di marihuana y cocaina.  Den tur razzia, na un forma preciso a coordina y a haci uzo di diferente teamnan di KPA manera; Team di aresto, K-9 Unit, Flexteam, RRT y polis uniforma di Noord.

   Vocero policial a sigura na DIARIO, cu Unit Narcotica NO ta drumi, lo sigui traha pa mantene Aruba sigur. Cu yudansa di comunidad na Tiplijn 111-41, e oficialnan aki por sigui investiga, haci detencionnan y pa nos hobennan por tin un futuro sigur liber di esnan cu kier hacinan daño!  Di awor caba Cuerpo Policial kier yama danki na nos comunidad pa tipnan cu nan ta ricibi.