GGZ y HUNTO lo brinda un miho servicio di cuido ambulatorio na comunidad

Dalgis Montalvo, director di GGZ:

ORANJESTAD (AAN) – Manera ta conoci Stichting GGZ, den e ramo di Salud Mental, a uni cu HUNTO, pa nan duna un miho servicio na comunidad.

Dalgis Montalvo, Director di cuido ambulatorio di GGZ a indica cu adiccion ta cay den e parti di salud mental, y pesey GGZ y HUNTO a join otro, pa asina brinda un miho servicio bao un solo dak.

Montalvo a splica cu en principio SPD cu tabata un dienst di gobierno y FMA cu tabata un fundacion apart, semper a traha hunto cu GGZ, y nan tabata tin e problematica di doble diagnostico, cual SPD ta brinda ayudo pa loke ta e parti di Psiquiatria, y FMA cu ta maneha e parti di adiccion. Kiermen, semper tabata tin lazo cu otro y bon comunicacion entre e dos instancianan aki, y mirando cu nan y GGZ tin e mesun forma di traha, ambos ambulatorio, a dicidi di uni forza y e ora ey nan por tin tur e disciplinanan pa por yuda comunidad.

“Actualmente, nos ta actua e servicionan, SPD a pasa di loke ta e parti di ayudo ambulatorio basico solamente pa adulto, aworaki nos ta yudando mucha y hoben. Tambe nos a amplia esaki hunto cu AZV, pa loke ta ayudo basico pa psicologia. Nos ta ripara, y mi ta kere mundialmente, cu hopi persona cu tabata tin problema di salud mental, traumanan of depresion, e pandemia a haci cu esakinan a bin ariba. Anto, y mirando e listanan di spera cu tabata tin, nos a bin den consensus pa por a habri e servicio aki, y nos a tuma e ora ey psicologo, trahador social y enfermeronan cu experiencia den psiquiatria pa por maneha e problematica aki”, Dalgis Montalvo a señala.