E sintoma mas relevante di omicron ta fatiga

ORANJESTAD (AAN) – Docter Juan Rivera, ken ta un di e docternan di Univision cu regularmente ta elabora riba e tema di Covid-19 y su variantenan, vooral omicron den e dianan aki, ta mustra preocupacion pa motibo cu hopi hende cu ta vacuna, ta hayando e virus.

E ta reconfirma asina cu no obstante cu e persona a tuma e vacuna, mester sigui tur e medidanan di protocol, y no kere cu omicron ta djis un griep.

E ta comenta via su cuenta den un di e rednan social, cu hopi hende ta puntre cual ta e diferencia entre griep y omicron.

El ta menciona cu omicron no ta duna keintura halto, manera si por sosode cu griep, pero e tosamento y malestar den e garganta causa pa griep y pa omicron, si ta similar.

E sintoma di mas relevante pa un hende por sa si e tin griep of omicron, ta e fatiga. Omicron ta causa un fatiga extremo cu griep no ta ocasiona. Un persona cu ta bira sumamente cansa di un momento pa otro, mesora mester bay pasa e PCR test y manera por spera, e sali positivo, e mester isola su mas inmediatamente. E unico manera toch di sa si un hende tin covid-19 y su variantenan sea delta of omicron ta via e PCR test, el a bisa.

Tambe e docter, via un noticiero di Univision, a alerta e personanan cu kier wordo contagia cu omicron y cu ta kere cu contaminacion masal ta e solucion, cu esaki ningun momento ta e solucion, pero e ta un riesgo hopi grandi pasobra na dado momento por surgi un otro variante y cu ningun hende por predeci si ta bin mas noble of mas agresivo, y si e hendenan ta expone nan mes den aglomeracion cu e intencion di contagia nan mes, e consecuencianan por ta desastroso. E hunto cu dos otro docter a elabora riba e tema aki, y tur ta coincide cu no ta prudente pa expone na contagio, intencionalmente.

Durante e programa aki tambe nan a elabora riba un di 4to dosis cu ya ta wordo aplica na Merca na esnan cu 60 plus y grupo di riesgo, cu a haya su booster na momento cu esaki a inicia, y pa esnan cu ta hayando nan booster di recientemente pa awo, aki seis luna, y esey podise lo bira un vacuna anual reforza contra tur variante.