Gobierno ni e fundacionnan encarga cu cacho no tin oido na destruccion cu cachonan ta causa den cunucunan

Jair Britten, Fundacion Pro-Cunukero:

ORANJESTAD (AAN) – Señor Jair Britten, Presidente di Fundacion Pro-Cunukero, den entrevista cu Matutino DIARIO a expresa su gran disgusto, tocante e situacion cu cachonan ta causa na varios cunukero, cu no sa mas kico pa haci pasobra gobierno ni e fundacionnan cu ta proteha animalnan (cacho y pushi) ta duna oido.

Jair Britten a bisa cu e cunukeronan ta hende educa, y asina aki nan a acerca gobierno, a papia cu ministernan y cu fundacionnan cu ta acoge cacho y pushi, pero nan no duna e agricultornan aki, oido.

El a comenta cu na Aruba tin 12 fundacion cu ta atende cu bestia, cu ta traha riba nan mes, y ta duna un servicio personal, mientras cu e cunukeronan ta duna servicio comunitario. Pero nan problema no ta hayando solucion, pero mas bien el a bira mas grandi, segun Jair Britten.

E ta haya cu como un pais educa, Aruba mester pone un paro na esaki. “Nos ta cabando 2025, ban drenta 2026 educa, ban pone e asunto aki straight”, el a exclama.

E Fundacion Pro Cunukero ta keda publica tocante e atakenan cu nan ta sufri door di cacho, cu ta dañando nan produccion. “Nos tin cu bin cu e revolucion agricola, nos ta bay mustrando tur caminda tur proyecto, di unda e placa, e ayudo mester bin, tur instancia, sector primario, pasobra ta e plan di ‘food security’ di Organizacion Mundial di Salud”, Jair a subraya.

El a agrega cu esaki ta un problema domestico pasobra hopi doño di cacho ta iresponsabel y asina lanta mil shelter pa animalnan e hendenan mes no ta educa y forma di yuda ta cuminza educa hende y duna ordo. “Si bo no gusta pa mata cacho, anto cuida nan drechi;  e resto, mata nan, simpel!”, Britten a expresa.