Glenda y su famia a bira miyonario cu Mini Mega

ORANJESTAD (AAN): E sorteo di Diamars anochi di Mini Mega tabatin tur hende cu wowo dirigi riba e bolitanan pa check kico ta sali.

   E number ganador di e anochi tabata 03, 04, 09, 15, y MegaBall ta 15.

   Un solo ganador tabatin, y como cu el a hunga e extra 2 Florin pa haci esey Mega Plus, el a gana 3.3 miyon Florin.  E ticket ganador a wordo cumpra na Hary’s Lottery, cu ta situa den Shaba Pastry.

   E ganadora a resulta di ta e simpatica señora Glenda, kende riba Diahuebs a presenta cu su esposo, famia y nietonan na oficina di Lotto na Playa pa busca su premio.  Aki mesora e funcionarionan di Lotto a controla si el a pone su firma parti patras di e ticket y su number di banco.  Como a ser spera, tur cos tabata perfecto!  Esey kiermeen cu Glenda ta semper atento di tur aspecto.

   E computer a confirma cu enberdad esey mes ta e ticket cu a gana 3.3 miyon Florin.  E mes a yega pa cobra su premio, y a mustra cu e no mester di abogado ni ningun otro persona pa cobra e premio pe.

   Esnan di Lotto a nota cu Glenda tabata super contento, y el a bisa nan cu e premio aki a pone cu awor e por cumpli cu un di su deseonan como mama.

   Aki por mira momento cu Glenda y su casa, e pensionado policial Fichi ta pose cu nan famia cu e dos cheque gordo, esta esun di Mini Mega, y esun di Mega Plus.

  Un palabra di pabien na e ganador.