Ministro Maduro ta gradici ATA Latino America pa nan presencia hunto cu corant

ORANJESTAD (AAN): El Tiempo di Colombia na e presentacion di e artista Arubiano Gilbert Senchi Arte y cultura tambe ta un forma pa atrae turismo pa Aruba

  Na ocasion di bishita di Minister Maduro di Cultura na e atalier di e artista Arubiano Gilbert Senchi na Bogota, señora Miriam Dabian directora di ATA pa Latino America tabata presente y a percura pa prensa na Colombia tambe worde poni na altura di e trabao nan cu ta worde haci pa integra mas arte publico na 'La isla Feliz de Aruba.'

   Turismo ta diversificando y e turista cu ta bishita Aruba mas y mas ta busca pa haya sa mas di e historia y e cultura di nos Pais. Pa e motibo aki na ocasion di e bishita di Minister Maduro na e atalier di e artista Gilbert Senchi, a invita señora Miriam Dabian pa asina ATA Latino America tambe por haya sa mas di e trabaonan cu ta worde haci pa integra mas obra di arte publico na Aruba.

  E obra 'Driekel' cu proximamente lo bay dorna un retonde den e area turistico di nos Pais, ta un obra di arte publico cu ta conscientisa nos y brinda honor na tur esfuerso cu ta worde haci pa proteha e Driekel cu ta scohe Aruba pa bin traha su neishi y pone su webonan. E Driekel tur aña ta biaha miles di miya pa bin Aruba y ta nos Pais su promer 'repeat visitor.' Pa e motibo aki e obra di arte publico 'Driekel' ta brinda honor y gratitud tambe na tur turista cu ta bishita nos Pais tur aña.

  Minister Maduro ta gradici señora Miriam Dabian y staf di ATA Latino America hunto cu reportero di El Tiempo pa tabata presente na ocasion di e 'private viewing' di e obra Driekel. Arte y Cultura tambe ta un forma pa atrae turismo pa Aruba y e mandatario ta contento di por a comparti informacion riba e plannan pa integra mas arte publico na encanto di turismo na Aruba.