Final di Baseball Double-A a para te proximo aviso

The content originally appeared on: Diario

*Despues di 1 di September lo por determina ki dia tur cos ta sigui


ORANJESTAD(AAN): Manera ta conoci Gobierno a tuma e decision di introduci algun medida nobo di COVID-19, mirando cu nos isla a wordo confronta recientemente cu un aumento grandi di caso di contagio y un situacion alarmante na hospital, cu ta sinti presion debi na e cantidad di pashent di Coronavirus interna.

Un di e medidanan cu Gobierno a bin cune ta cu tur competencia y campeonato deportivo ta wordo para.

Esaki ta inclui baseball, pues e final di baseball Double-A entre Atco Indians y Red Machine a wordo para te proximo aviso.

Na momento cu e medidanan nobo a wordo anuncia, e serie di best of 7 tabata 2-1 na fabor di Indians, pues esaki nifica cu por lo menos 2 wega mas mester wordo hunga, pa determina ken ta bira campeon di Aruba.

Relaciona cu esaki e comision di ABBA encarga cu e campeonato a saca un comunicado di prensa pa confirma cu e final ta wordo para te cu por lo menos 1 di September, cu ta e dia riba cual Gobierno lo anuncia si e medidanan ta keda vigente, of si lo bin un cambio den esaki.

E momento cu wordo dicidi cu deporte por cuminza bek, e final di Double-A lo continua.