Minister Dangui Oduber sumamente satisfecho cu resultado di Expo contra malesanan cronico

ORANJESTAD (AAN) – Minister di Salud y Turismo, Dangui Oduber, a elogia e Expo cu a tuma lugar riba Diasabra ultimo,

cu instancianan di salud a organiza conhuntamente, contra malesanan cronico.

“E intencion tabata pa organiza esaki hopi tempo pasa, pero pa motibo di e pandemia mester a postpone esaki y mi ta contento cu por a mira continuacion Diasabra ultimo, di sigur un Expo sumamente exitoso, no solamente pa e cantidad di benders cu tabata tin di fundacionnan cu a participa, sino tambe pa e cantidad di bishitantenan cu nos tabata tin durante henter dia”, e titular di Salud a subraya.

E mandatario a expresa su gradicimento na e Plataforma Promocion di Salud, Ministerio di Salud, Departamento di Salud Publico, pa por a organiza e Expo aki, unda cu comunidad a haya e oportunidad pa haci chekeonan medico, manera check presion, sucu y colesterol y haya hopi informacion tocante kico nos por haci pa mehora nos estilo di bida, mehora y cambia esaki pa tin un bida mas saludable, y kico ta e riesgonan di no tin esaki.

Minister di Salud a reitera cu e tabata un expo sigur exitoso, y el a indica cu interesante ta cu durante esaki a presenta varios benders na e bishitantenan, cu alternativanan pa cumindanan cu normalmente ta wordo considera no saludable. E minister a expresa cu e ta kere cu Aruba ta bayendo den bon direccion y loke gobierno ta haciendo di su banda, ta cu no solamente ta reitera hopi e palabra prevencion, sino cu e ta tumando direccion y accionnan concreto pa asina financia diferente proyecto cu tin di haber cu prevencion.

“Di e forma aki, Gobierno a lanza algun tempo pasa, cuater proyecto specifico cu nos ta bay pone hopi atencion riba nan. Un di nan ta e ‘Healthy Lifestyle Center’ cu nos ta den e fase final pa tin su apertura. E centro aki su tarea principal ta pa yuda tur esnan cu tin problema cu peso y sobrepeso, y ta pasando den momentonan dificil cu nan obesidad. Nos ta bay yuda nan cu profesionalnan, nutricionistanan, psicologonan pa cambia y mehora nan estilo di bida”. Asina Minister Dangui Oduber a splica.

El a agrega cu e proyecto aki aki ta dirigi na tur esnan mayor di 18 aña. Otro proyecto cu ta bay enfoca riba dje ta “Jump e teen” cu aña pasa a cuminza cu un proyecto piloto di muchanan di cuater te cu 18 aña cu tambe tin problema cu sobrepeso.

E mandatario a bisa cu e proyecto piloto aki a resulta super exitoso unda cu durante seis luna largo, e mucha y hobennan aki a wordo yuda pa profesionalnan pa cambia nan estilo di bida. Despues di e seis lunanan aki ningun di e mucha y hobennan cu a participa activamente den e programa menciona, a subi di peso. Ora e proyecto piloto a termina, a tene un ceremonia pa entrega e certificadonan y por a wak den e expresionnan di tur e mucha y hobennan, con contento nan tabata cu por a cambia nan estilo di bida y aumenta nan self-esteem enormemente, participando den e programa aki. Aworaki nan ta hiba un bida hopi mas saludable, e mandatario a acentua.