Ningun politico ta papiando di e 2% extra cu pronto pueblo ta bay paga via debit card

Frans Ponson ta lamenta:

*Tin comercio cu ta cobrando caba “swipe fee” 

ORANJESTAD (AAN) – Presidente di CUA (Comerciantenan Uni Aruba) Frans Ponson, siguiendo cu su entrevista cu DIARIO, a declara cu pueblo ta suficientemente inteligente pa sa, cu mescos cu ora gobierno a bin cu BBO di 3%  comercio a pas’e, 1 di Januari e ta bay bira peor, si e 2% ta wordo cobra (riba debit card Visa y Master), pueblo sa ken ta bay paga esaki.

“Mi ta lamenta di no a tende nada riba e topico aki, y pronto boso ta bay haya e BBO cu awe ta na 7 y mey porciento )pasobra nos a yega di tende e storia di BBO riba BBO) bo ta bay haya 2% mas hinca aden. Pa cuminzamento di otro aña bo ta bay haya gewoon cu tur comerciante ta bay cobra boso y for di awe caba, hopi comerciante ta bay cobra pa bo swipe fee”, Ponson a señala, agregando cu por wak riba facebook y internet cantidad di caso tocante esaki.

“Kiermen, ta un topico hopi grandi y mi no a tende ningun politico papia e asunto aki y con nos ta bay handle cu ne”, el a reitera.

Ponson a cuestiona cu aworaki tur minister ta papiando di BTW como e solucion. El a clarifica riba BTW pa tur hende, cu tin su cosnan positivo pero tambe su consecuencianan. Tur compania cu ta importa producto un biaha ta un schakel. BBO ta subi prijs solamente pa e personanan cu ta cumpra via Amazon. Si un hende a cumpra un keds via Amazon cu no ta paga BBO, si cumpre na Aruba si e mester a paga BBO. “Esey el a cambia, pero no a cambia e comerciante. Aworaki e supermercadonan chikito cu boso tin banda di boso cas, cu ta cumpra di wholesale na Aruba, tin dos schakel. Eseynan si mester tin un cambio pasobra e lo por cu BTW bira un schakel. Pero corda si cu e cifra di BTW ta bay ta hopi mas halto cu BBO. Kiermen, tur e companianan cu mi a menciona cu awo tin BBO ora ta bin cu BTW prijs ta bay ta hopi mas caro”, Ponson a trece dilanti.