Wings of Hope di AAA inspirando speransa na Scol Caiquetio

ORANJESTAD (AAN): Recientemente e team di Wings of Hope (WoH) di Aruba Airport Authority N.V.

a ricibi invitacion di parti di Scol Caiquetio riba dialuna 1 di december pa un celebracion special pa destaca e donacionnan haci n’e scol.

Scol Caiquetio ta un scol basico dedica na cuida, educa y empodera e studiantenan cu necesidad di siñamento diverso. Nan mision ta pa crea un ambiente inclusivo unda cada mucha ta sinti su mes scucha, guia y celebra. Como parti di e rutinanan diario y e actividadnan educativo di e scol, comunicacion audiovisual ta hunga un rol esencial den duna instruccion, organisa presentacionnan, celebra logronan y mehora e experiencia den klas.

Den luna di september, Wings of Hope a ricibi un peticion di donacion pa facilita Scol Caiquetio cu e ekipo di zonido necesario pa nan klas, loke ta permiti un miho comunicacion y un manera di siña mas inmersivo. Un total di mas o menos 50 alumno y docente a prepara y entrega un presentacion emocional, creativo y pensativo pa e miembronan di e team di Wings of Hope presente, incluyendo un cancion dedica, un show teatral di scol cu material di Wings of Hope y AUA Airport y un regalo special decora cu Wings como muestra di gratitud pa e sosten cu nan a ricibi.

E miembronan di e team di AAA Wings of Hope a expresa nan gratitud na e docentenan y e alumnonan pa un celebracion memorabel y special. Ta e momentonan aki ta recorda nos cu cada esfuerso y contribucion, sin importa con chikito of grandi, ta trece felicidad y speransa pa esnan cu mas tin mester di dje. Teniendo na cuenta cu Responsabilidad Social Corporativo ta parti di e strategia di sostenibilidad di AAA y e balornan di e compania, Wings of Hope lo sigui en busca di proyectonan a largo plaso cu ta beneficia henter e comunidad y ta curasha otro organisacionnan pa haci mescos.