Minister Tjon ta felicita Cuerpo Policial cu e tremendo resultado di e control preventivo riba careteranan

The content originally appeared on: Diario

40 Agente Policial extra a wordo poni na puntonan strategico

ORANJESTAD (AAN):  Den fin di siman, hopi ta esnan cu por a tuma nota di un batayon di Agentenan Policial riba diferente puntonan strategico riba nos careteranan. Ta asina cu a tene un accion preventivo pa asina conduci un buskeda pa cualkier auto sospechoso pa entre otro coremento bou di influencia, armanan ilicito, of core auto sin documentonan oficial.

            Minister di Husticia y Asuntonan Social Rocco Tjon a ricibi e rapport di e resultadonan, y ta felicita henter e ekipo di Cuerpo Policial di Aruba cu a haci un tremendo trabou, manteniendo orden riba nos careteranan.

            Den fin di siman, specificamente dianan 5, 6 y 7 di Augustus a haci diferente tipo di control riba nos careteranan. 40 Agente Policial extra a wordo poni na puntonan strategico riba nos isla pa asina conduci un control extenso riba nos careteranan. A base di e rapport por deduci cu a haci un total di 129 control, a para 119 auto, di cual a conduci un control por completo di 26 auto. Banda di esaki a detene 46 persona, a nota 50 proceso verbal, a sera un localidad, 14 auto a bay in bewaring y in beslaggenomen, tambe a confisca un arma blanco y un arma di candela.

            E accion aki ta cay como parti di e maneho den cuadro di “Iron Eagle”,  cual pa un tempo defini, Cuerpo Policial lo ta mucho mas visibel riba caya. Manera a presencia den fin di siman, comunidad por spera cu lo bay tin mucho mas control y lo haci uzo di tur posibilidad cu ley ta brinda, manera entre otro “preventief fouilleren” pa por ehecuta cierto controlnan extra ordinario. Banda di esaki a aumenta control riba vehiculonan y establecimentonan, pues e ta importante pa tin tur papel na ordo, pasobra esaki lo bay wordo controla.

            Por ultimo, minister Tjon ta felicita henter e ekipo di Cuerpo Policial di Aruba pa e tremendo ehecucion. Lo sigui boga pa e recursonan necesario pa asina eleva e siguridad pa nos Agentenan Policial, kende ta riesga nan mes tur dia pa mantene orden y siguridad riba nos isla. Asina por wak bek na algun recurso cu ya a wordo adkiri manera, camara di siguridad na tur warda di polis y dentro di poco lo adkiri e “bullet proof” vestnan. Asina por conclui cu lo tin mas proyectonan na caminda pa mehora e calidad y servicio pa cu Cuerpo Policial di Aruba.