Walter Mosher ta inicia oficialmente como Director nobo di Free Zone Aruba N.V.

Minister Geoffrey Wever:

ORANJESTAD (AAN): Minister di Finansa, Asunto Economico y Sector Primario, Geoffrey Wever, den su calidad di representante di Land Aruba como unico accionista di Free Zone Aruba N.V. (FZA), ta anuncia cu Sr. Walter E. Mosher a inicia oficialmente como Director nobo di FZA, dialuna dia 2 di februari 2026.

E nombramento aki ta marca un paso importante den e proceso di fortalecemento institucional y modernisacion operacional di Free Zone Aruba, un entidad cu tin un rol strategico esencial den diversificacion economico y posicionamento internacional di Aruba.

Sr. Mosher ta un profesional Arubiano cu, despues di un trayectoria trahando den sector priva na Aruba, a continua cu un formacion academico y experiencia profesional relevante den diferente sector. Despues di varios aña di experiencia internacional, Mosher a tuma e decision consciente pa bolbe Aruba cu e proposito claro di aporta activamente na desaroyo economico y institucional di su pais.

Segun Minister Wever: “Mi ta sumamente contento cu Sr. Walter Mosher a haci su mes disponibel pa lidera Free Zone Aruba den e era nobo. Mi tin pleno confiansa den su profesionalismo y experticio. Sr. Mosher ta un Arubiano cu hopi experiencia local y internacional, y cu pa hopi aña tabata biba na exterior, pero awo ta bolbe cas pa traha pa Aruba.”

E nombramento di Sr. Mosher ta resultado di un proceso di seleccion riguroso, ehecuta door di e Hunta di Comisario di FZA. E proceso di solicitacion publico a atrae varios candidato cualifica, cu evaluacion tecnico, consulta profesional y intercambio extenso cu e Hunta di Comisario y cu e Minister como accionista representativo, resultando den un acuerdo completo riba tur condicion contractual.

Minister Wever a expresa su reconocemento na e Hunta di Comisario pa su liderazgo durante un periodo di transicion importante pa FZA. E restructuracion institucional, incluyendo e implementacion di un plan di abordacion, un roadmap strategico y e instalacion di un Hunta di Comisario nobo, a establece un base mas solido pa maneho transparente, maneho eficiente y un direccion claro pa futuro.

Den su rol como accionista y minister responsabel, Minister Wever a subraya cu e nombramento di un director nobo ta un paso clave den e continuacion di reformanan institucional, operacionalisacion di esfuersonan di modernisacion y preparacion di Free Zone Aruba pa competi mas efectivamente den mercado internacional.

Free Zone Aruba tin potencial pa bira un motor di crecemento, innovacion y actividad economico nobo, specialmente den un contexto unda Aruba ta sigui busca pa diversifica su base economico riba un manera duradero y resiliente. Recientemente, un lista di actividadnan y oportunidadnan nobo cu lo fortalece e rol di Free Zone como catalisador pa inversion y emprendemento a keda anuncia.

Cu e nombramento di Sr. Walter E. Mosher, oficialmente ta inicia un era nobo pa Free Zone Aruba N.V., basa riba liderazgo local, vision strategico y un compromiso firme cu desaroyo economico di Aruba.