Awetardi tin Evento Informativo pa Comunidad

Carolina Span di Fundacion Autismo Aruba:

ORANJESTAD (AAN): Luna di april ta dedica na conscientisacion di autismo. Mundialmente, ta enfoca pa crea mas comprension, empatia y inclusividad, reconociendo cu diferente manera di pensa y sinti ta enrikece nos comunidad, haciendo nos mas fuerte y mas conecta.

   Durante e luna aki, Fundacion Autismo Aruba (FAA) ta sigui fortalece su programa pa educa y inspira comunidad.  Carolina Span di FAA a informa tocante nan  evento pa comunidad cu lo tuma luga awe tardi, 13 di april na Aruba Marriott Resort & Stellaris Casino. E evento lo cuminsa pa 5:30 pm y lo ta na e idioma Papiamento.

   Diferente organizacion ta bay forma parti di un panel pa brinda informacion con nan como organizacion, ta brinda servicio na e grupo di ciudadano cu e condicion aki y nan famia. Entre otro lo ta presente: Fundacion Autismo Aruba; Dienst Publieke Scholen; Bureau Multidisciplinair Centrum; Stichting Hunto; Respaldo; Jeugdgezondheidszorg (DVG); Directie Sociale Zaken; Wit Gele Kruis; Inspectie Volksgeondheid Aruba; AZV.

   “Hopi biaha, segun señora Span, ciudadanonan cu tin yiu of famianan cu autismo, no sa unda of cerca cua profesional nan mester bay. E meta di e actividad aki ta pa guia y informa comunidad di e diferente organizacionnan y e servicio cu nan ta brinda na e comunidad autista y tambe na nan famia”, señora Span a expresa.