Un aña di prison pa homber cu a haci actonan inmoral cu tres dama na lugarnan publico

​

Victimanan a expresa nan disgusto den Corte contra e acusado

ORANJESTAD (AAN): Diabierna mainta despues di basta rato di tratamento di e caso, Hues a condena e homber P.(27) igual na e exigencia di Fiscal esta 1 aña di prison pa a haci actonan inmoral cu tres dama na lugarnan publico.

   Acusacionnan: Den sala di Corte, dos di e tres victimanan tabata presente. E acusacionnan cu Fiscal a presenta contra P. ta cu 28 Maart 2023 a haci actonan inmoral cu dama D., 26 April 2023 a haci actonan inmoral cu dama B. y 28 October 2023, a haci actonan inmoral cu e dama G.

   Frega cu parti intimo tras di Damanan: Ora Hues a cuminsa cu tratamento di e caso, el a bisa cu P. a admiti e caso di 28 Maart 2023 y ta desmenti e otro dos acusacionnan. Hues a bisa cu segun relato di Polis, e dama D. a haci denuncia riba 28 Maart 2023. El a bisa cu el a bay na un tienda y ora el a habri porta pa drenta e tienda, el a sinti un hende ta frega su parti intimo su tras. Ora el a bira, el a wak un homber di color cu cabey dreadlocks ta cana bay. E dos trahadornan dama di e tienda a mira kico a pasa cu e dama.

   Ta asina cu Polis a haya e Security Video di e tienda caminda ta mira cu P. tabata cana tras di e dama. Polis a detene P. y durante interogacion a mustra P., e video y el a admiti cu e tabata bou influencia di marihuana y a haci’e. El a bisa cu e kier guia di Reclassering. E acto inmoral aki a sosode den oranan di dia y na un lugar publico. Hues a puntra P. pakico el a hacie. Segun P., algo a pasa cu ne den su mente cu e mes no ta compronde. El a bisa cu e ta arepenti di loke el a haci.

   Hues a mustra cu e dama B. a haci denuncia cu 26 April 2023, caminda el a bisa Polis cu el a bay na un tienda atardi na Oranjestad. El a cana bay na su auto den un parkinglot den John G. Emanstraat, caminda tabatin mas auto. Ora e tabata meymey di e autonan, un homber di color cu dreadlocks para su tras. El a pensa cu e homber lo kier drenta e auto para banda di esun di dje. E homber a cana pasa tras di B. y a cuminsa frega su parti intimo contra B. E ora ey B. a push’e y grit’e mientras cu P. a sigui cana bay. B. a bay den su auto y sigui su tras y a graba P. riba su smartphone. Polis a haya e video cu B. a graba y a confronta P. cu e video.

   Segun P. loke B. ta bisa cu no ta berdad. Segun P. el a pasa entre e autonan y su tas a dal contra B. El a bisa cu ta cu lomba el a pasa tras di B. E ta desmenti di a mishi cu su parti intimo contra e dama B. su atras. Hues a pidi e dama B. cu tabata presente pa scuch’e como testigo. E dama B. a desmenti loke P. a bisa. Segun B., ora el a bira el a mira P. su cara su tras y frega contra dje. E ora ey B. a push’e. P. a keda insisti cu e tabata cu lomba pa B. ora el a pasa y hasta a bisa sorry ora su tas a dal contra B.

   E caso 28 October 2023, e dama G. a haci denuncia. El a bisa cu mas o menos 6.30’or di anochi, el a sali for di un lugar y tabata hincando su instrumentnan den auto. Na dado momento, el a sinti un homber ta frega cu su parti intimo su tras. El a bira puntra e homber: “ kico ta pasa bo”. E momento ey e homber a puntr’e si e kier ayudo. El a bisa cu no y despues e homber a sigui cana bay. G. a drenta den su auto y despues cu el a realiza kico e homber a haci, el a bay pa reclam’e pero no a hay’e. Su siguiente dia el a bolbe a mira e homber y a baha for di auto y a reclama e homber cu otro biaha e lo bay Polis. E homber a bis’e cu no señora ta djis kier a yud’e. G. a saca su potret y a manda e potret aki pa Polis.

mes a declara na Polis cu e dia ey el a caba di traha y a bay busca bus. El a mira e dama cu su instrumentonan y cu e dama lo tabatin problema pa hinca su instrumentonan den auto. E ora ey P. a bay para banda di e dama pa ofrece su ayudo. Na dado momento e dama a spanta ora el a mira P. y P. a puntr’e si e mester ayudo. E dama a bisa cu no y e ora ey P. a sigui cana bay busca bus. Segun P., e dama no a push’e. Despues di algun dia, el a mira hende ta film’e y ta resulta cu ta e dama G., kende a reclam’e pa a frega na dje.

   Hues a mustra cu na Juli 2023, Hof a dicidi pa laga P. liber pero na October 2023 G. a haci denuncia y Fiscal a ordena pa bolbe detene P.

   Problema cu deseo sexual: Hues a mustra cu tin raport di Reclassering cu ta bisa cu e chens ta grandi cu P., por bolbe haci e mesun cos. Nan ta conseha guia di Reclassering pa P. haya trabao. Raport di psicologo ta mustra cu P. lo tin un problema cu ta causa cu regularmente e tin problema cu otronan. Parce cu P. no por controla su emocionnan. Tambe cu P. lo ta haya deseo sexual diripiente y ta haci e cosnan aki pa calma su emocionnan. Ta parce cu P. ta uza marihuana pa baha su emocionnan. Psicologo ta mustra cu P. no ta pensa riba consecuencia di loke e ta haci. E tin problema di personalidad. Psicologo ta haya P. menos responsabel pa loke el a haci. E ta haya cu P. mester haya tratamento pa evita cu e lo bolbe haci cosnan asina. Psicologo ta conseha cu P. mester haya guia intensivo di Reclassering pa tempo largo y tratamento psicologico.

   Victimanan por papia den Corte: Door di cambio di ley, awor ta posibel cu victimanan por papia den Corte. Nan por bisa con nan a sinti.

   Victima B., un docente, ta e promer persona cu a expresa su sentimento. El a bisa cu un simpel atardi a daña su bida. El a keda cu trauma. El a bisa Hues, cu cada vez cu e pensa cu a pasa, e ta keda sin drumi. El a bisa cu ora e mira un persona parecido na e acusado, e ta pensa pakico e ta pasa den un situacion asina. E victima a expresa cu e ansha, angustia y miedo cu el a sinti na e momento di e fregamento, nunca el a yega di sinti. El a keda cu miedo di bay den caya su so pa algo pasa cu ne. El a bisa Hues cu e berguenza cu el a sinti, despues di e lamentable sucedido, pa yega cas pa conta kico a pasa cu ne. El a bisa cu promer pa tempo largo e tabata culpa su mes di lo a para su auto leu. E dama a bisa Hues cu e ta un docente di muchanan adolescente y ta pensa kico lo pasa cu muchanan. El a bisa cu e ta spera cu P. tin suficiente consenshi y pa e haya tratamento.

   E otro victima G. a bisa cu e ta agradecido cu tin husticia. E tin berguenza di loke a pasa. El a bisa cu e ta comparti gran parti di loke e dama B. a bisa. G. a bisa Hues cu e tin miedo, inseguridad, rabia. E ta sinti cu algo sushi a pasa cu ne.

   Fiscal: Fiscal, despues di a scucha e victimanan, a bisa Hues cu actonan inmoral ta dificil pa haya prueba pero den e caso aki tin suficiente prueba di sosten. E ta haya e ultimo 2 casonan ta laga na Hues pa dicidi si P. ta culpable ya cu P. ta desmenti. Fiscal ta haya cu tur tres dama a bisa cu P. a frega cu su parti intimo na nan parti patras. Fiscal ta haya cu tin prueba legal mirando cu e acusado P., a keda haci e mesun forma na tres diferente lugar. Na opinion di Fiscal, door cu P. a admiti e promer caso so, por usa esey como prueba pa e otronan cu el a desmenti. Fiscal a bisa cu tur tres dama a bisa e mesun cos esta cu riba caminda publico P. a frega riba nan cu su parti intimo.

   Castigo: Fiscal a bisa cu P. ta mustra cu e no tin ningun respet pa e damanan aki. Por a scucha e damanan bisa cu esaki a afecta nan bida. El a bisa cu e ta tene cuenta cu tur esaki pa cu e castigo. El a tene cuenta cu e raport di Reclassering y Psicologo cu ta mustra cu P. ta menos responsabel pa su actonan. Fiscal a exigi 1 aña di prison di cual 4 luna ta condicional y 2 aña di prueba. E parti di 2 aña di prueba ta mara na e condicion special cu P. mester cay bou guia intensivo di Reclassering.

   Abogado: mr. Kuster a bisa cu tin 3 denuncia caminda e mesun delito a wordo cometi. E abogado a bisa Hues cu P. (27) segun raport di psicologo, tin e mentalidad di un mucha di 11 aña. For di edad jong e ta usa marihuana y tabata hay’e den agresividad cu e mester a bay institucion na Aruba y Curacao. E abogado a mustra cu P. no sa con pa atende cu su emocion. Psicologo ta mustra e problemanan cu P. tin y cu P. mes no tabata sa cu e tin problema di sexualidad. E rapport ta papia cu P. ta menos responsable pa su actonan. E abogado a bisa cu P. a bisa cu e kier ayudo di Reclassering. Psicologo ta recomenda tratamento di psicologo y psychiater. Awor cu tur cos ta conoci, P. lo por haya un tratamento mas adecuado. E abogado ta haya cu mas liher P. haya ayudo, lo ta mas mihor p’e envez di keda sera den KIA.

   Sentencia: Hues a sera tratamento di e caso y a dicta sentencia di biaha. Hues ta haya proba e promer hecho cu P. mes a admiti. Hues ta haya e otro dos casonan tambe proba. Hues no ta duda den declaracion di e damanan y tambe e forma con esakinan a sosode ta mesun cos. Tur tres caso ta damanan adulto y na lugar publico y di sorpresa. Esaki ta haci cu por considera tur tres caso mesun cos.

   Pa cu e castigo, Hues a tene na cuenta e impacto cu loke P. a haci cerca e victimanan. Tambe Hues a tene cuenta cu raport di psicologo cu P. ta menos responsabel y cu P. mester haya tratamento. Hues a confirma e exigencia di Fiscal. El a condena P. na 1 aña di prison di cual 4 luna ta condicional y 2 aña di prueba. E parti di 2 aña di prueba ta mara na e condicion special cu P. mester cay bou guia intensivo di Reclassering.