The content originally appeared on:
Diario
FPNA ta lanza proyecto piloto pa fin di Maart:
ORANJESTAD (AAN) Prome cu fin di luna Fundacion Parke Nacional Aruba (FPNA), ta bay lanza un proyecto piloto, eigenlijk pa conta cuanto hende ta bishita Conchi (conoci como ‘Cura di Turtuga’) y tambe Fontein, cu ta e di dos punto cu ta haya mas bishitante.
Den entrevista cu DIARIO, Tyson Lopez a duna di conoce esaki, y a splica cu nan ta bay conta cuanto bishitante ta yega na e punto di interes y ki ora ta e peak y ki ora e off-peak.
“Y un bez cu bo tin e informacion ey den bo man bo por maneha miho, traha cierto palabracionnan cu e tours operators, pa asina spread tambe e cantidad di turistanan cu ta yegando na mesun momento.
Pues, pa fin di luna nos ta cuminza cu e proyecto aki pa wak si nos por tin e cifra di cuanto hende ta bishita e area aki, e frecuencia (ki ora esaki ta pasa), pa nos mehora nos maneho”, Tyson Lopez a señala.
El a agrega cu enberdad no ta un experiencia placentero si e turistanan ta bay y tur hende ta hunto, por ta net mey ora despues ningun hende teynan. E ta sosode cu tin ora cu tur hende ta yega pareu y mey ora despues, e ta bira keto. Director di FPNA a subraya cu pa nan haci un miho maneho di e area, nan mester tin e datonan menciona, y pa casualidad nan a caba di haya e tools necesario cu nan mester instala pa colecta e datonan aki.
Lopez a splica cu como cuater aña pasa e companianan cu ta opera turismo a acerca FPNA, puntra con por maneha e yegada di bishitantenan na Parke Arikok miho, y si nan tin e datanan. Esey ta algo cu Lopez ta kere cu nos mester yega na otro cu’ne. E no ta algo imposible, el a bisa, pasobra na lugar cu tur hende yega na Conchi pareu, nan por wordo distribui den gruponan, uno ta bay Conchi, otro ta bay otro area y asina aki. El a reitera cu FPNA tin bon relacion y comunicacion cu e tours operators cu ta opera den Parke Nacional Arikok, y un bez cu nan kier duna un miho experiencia y servicio na e bishitante, e ta algo cu ta bon bini.
