Turismo a cay bastante desde cu Teleferico di Merida a cera

MERIDA: Manera ta conoci, desde comienzo di aña 2020 e famoso Teleferico na Merida (Venezuela) a wordo cera. 

E tempo ey, te ainda ningun hende sa e motibo pakico a cera e atraccion turistico aki, y awor na 2022 ainda e no ta habri bek.  Esaki a pone cu turismo pa e estado di Merida, tanto di pueblo local, y pueblo internacional a cay masha hopi mes.

   Esey ta loke e president di Camara di Comercio y Industria di estado Merida, Jose Miguel Monagas a declara den un boletin.

   “E paralisis di e Teleferico y di Aeropuerto Alberto Carrievali ta e problemanan di mas serio cu ta afectando turismo na Merida.  Autoridadnan civil di Merida a bisa cu e aprobacion pa vuelonan comercial usa e Aeropuerto ey bek, ta den man di Aviacion Civil INAC na Caracas.

   A ser mustra cu tur e comerciantenan cu ta traha rond di e Stacion Barinitas cu ta unda e entrada di e Teleferico ta, na municipio Libertador di estado Merida, a bisa cu e ciere di e atraccion aki a afecta turismo, y completamente nan entrada mensual.

   Ultimo lunanan mes, casi nan no a bende nada.  “Teleferico a wordo cera, hasta prome cu e pandemia a start,” ta loke e comerciante Wilmer Flores a bisa.  E ta traha dilanti e entrada di Teleferico, y a bisa cu turismo a cay considerablemente.

   “Esaki tabata loke tabata duna bida na Merida, y si e Teleferico no ta funciona, hende no ta yega eynan,” e bendedor Armando Ramirez a bisa.  Hopi hende ta yega eynan djis pa e Teleferico.

   Aunke e Teleferico ta paraliza, e area abao na stacion Barinitas cu ta dilanti Plaza Las Heroinas, ta habri pa asina publico por yega na e tiendanan y para na e mirador.  Apesar cu e ta un punto di interes di e ciudad, eybanda tin un prohibicion pa usa cameranan profesional.

   Gobernador di estado Merida, Jehyson Guzman, a bisa cu riba e Teleferico ta haciendo trabao di “dimension gigantesco” pa den futuro e por habri bek.  Pero e no kier a duna un fecha pa ki tempo esaki lo habri bek, pasobra e ta un decision cu tecniconan tin di bay tuma.