The content originally appeared on:
Diario
ORANJESTAD (AAN) — Pader Jose Miguel Nava, encarga di e Instituto Diosesano Catechetico den nos Diocesis,
particularmente den e Isla di Aruba, recientemente a reuni hunto cu scolnan Cayena, Agnes, y Santa Ana, pa motibo cu nan a desaroya un curso di identidad Catolico.
“Nos kier yuda nos maestronan y tur e personal docente pa descubri e buniteza di nos FE cu ta duna nos, no so un manera di relaciona cu Dios pero tambe ta duna nos un Cosmo-vision, un manera di mira nos realidad, un manera di actua, p’asina bao di e balornan Cristian nos por sigui educando nos, siñando nos muchanan, nos generacionnan nobo den nos sociedad”, Pader Nava a señala.
Den e curso a participa 30 maestro y tur a wordo certifica. Cu e certificacion nan ta sigui traha den nan scol, y lo sigui busca otro maestronan di otro scolnan di SKOA pa tambe por sigui traha den e preparacion aki. “Por bisa cu esaki ta un prome preparacion, e parti basico. Despues lo desaroya otro actividadnan pa sigui profundiza den e bunitesa di nos Fe y su balornan Cristian”, Pader Nava a expresa.
