Trahadornan di Boogaard Assurantiën a bolbe tene walkout

ORANJESTAD (AAN): Un conflicto laboral cu e trahadornan tin cu gerencia di compania Boogaard Assurantiën a pone cu siman pasa, na dos diferente ocasion nan a tene un walkout, y a bay para pafo.

   Tur dos biaha, Sindicato SEPPA tabata presente pa respalda nan, y duna nan informacion di pasonan cu ta bay tuma.

   Hecho ta cu e compania ta stagnando riba algun punto cu ta importante pa cu negociacion di un Contrato Colectivo nobo.  Diahuebs mainta e empleadonan a tene un walkout pa asina mustra nan malcontento.

   Diabierna merdia pa 2:30 pm, un biaha mas e empleadonan di anto Boogaard na San Nicolas, y e oficina na Oranjestad a sali pa mustra nan descontento cu gerencia ta ignorando nan.  Esey ta debi cu riba Diahuebs nan a entrega un carta na gerencia, pero Diabierna no a ricibi nada di reaccion.

    Magali Brito di SEPPA tambe tabata presente pa asina papia cu e trahadornan riba e impase cu tin, y a dicidi na tene un accion di 1 ora largo.  Mientras tanto paden, clientenan a cuminza sinti efecto di esaki como cu tabata tarda mas cu normal pa haya servicio.

   Si acaso no ricibi reaccion, lo por spera cu e accionnan lo sigui e siman aki, y hasta por escala.