Tin como 7.000 hende cu ainda no a haya e cuido cu nan mester pa salud mental

Respaldo ta pinta e storia manera cu e ta! 

ORANJESTAD (AAN): Despues di e sucedido spantoso y lamentable Diamars mainta na un Hotel local,

DIARIO tambe a puntra e instituto di Respaldo pa reaccion referente e situacion sumamente lamentable cu a socede,  unda cu un Arubiano a perde su bida despues cu el a indica cu e no por sigui cu su bida mas door di e depresion cu e tabata pasando aden.

   Na prome luga, e pensamento di Respaldo ta cune, su famia y amigonan. E ta duro ora un persona ta sufri asina hopi y e ta scoge esaki como su unico salida.

   Si tira un bista general na Aruba y tambe e sufrimento psikico bao comunidad, lamentablemente tin di bisa cu depresion severo y otro enfermedad mental ta hopi comun. Cifranan internacional y resultado di encuesta haci bou di 75% di Docternan di Cas ta indica cu mas o menos 10.000 pa 12.000 Arubiano mester di ayudo profesional cu nan salud mental.

   Na e momento aki 8.000 di e grupo aki no ta ricibiendo ningun tipo di ayudo pa cu esaki, aunke nan tin derecho pa haya esaki. E crisis di Covid a haci e situacion aki hopi mas pio.

   Manera cu DIARIO a trece dilanti numeroso biaha, Covid-19 a pone cu awor tin mas depresion, mas abuso di alcohol, mas violencia domestico, trastorno di anciedad, trauma psicologico, etc.

   E presion riba cuido en general, no solamente cerca Respaldo, pero tambe cerca Docternan di Cas, SPD y FMAA a crece enorme.

   Pa Respaldo esaki lamentablemente tambe ta nifica cu pa algun tempo nos no por duna un fecha pa un cita (intake) mas. E tempo di espera pa esaki por dura actualmente den cierto caso un aña.

   Desde comienso di e crisis Respaldo a bati alarma cu mester inverti mas den e cuido di salud mental. Mester hopi mas capacidad di tratamento. Specialmente den tempo dificil pa e economia tin mas presion riba comunidad, mas stress, mas sufrimento, mas anciedad.

   Lamentablemente e inversion aki no a sosode,  sufrimento a crece mas y lista di espera tambe, manera nos a indica algun siman pasa dennos rueda di prensa. Den Reino, Aruba ta hopi atras den cantidad di persona cu por traha pa e cuido di salud mental y tambe den e cantidad cu ta worde inverti den e cuido aki compara cu Curaçao, Islanan BES y Hulanda.

   AZV no tin e espacio den su presupuesto pa por duna e servicio di cuido necesario aki. Pa e motivo aki nos a puntra algun siman pasa Gobierno pa entrega un peticion na Reino pa sosten pa asina nos por yuda e cantidad adicional di personanan cu tin mester di sosten a consecuencia di e crisis di Covid, di mesun manera cu hospitaal a ricibi extra capacidad di cuido intensivo pa yuda pashentenan di Covid.

   Nan ta spera cu pronto algo lo worde haci cu nos peticion pa ayudo. 

Na e momento aki tin sigur 7.000 Arubiano cu ainda no ta haya e cuido cu nan mester di dje. Nos ta kere cu nos por yuda por lo menos mitar di e grupo aki si nos ricibi algun adicion relativamente simpel, riba locual nos ta haciendo caba. Solamente door di brinda e cuido necesario pa salud mental na e comunidad di Aruba tragedianan manera esun di awe lo por worde preveni y e chens cu famianan pa resto di nan bida mester sinti falta door di e perdida di un yiu, ruman, tata, mama of otro ser keri lo ta hopi menos.

   Pues 7.000 Arubiano cu tin derecho riba e cuido di salud mental no ta ricibi esaki. E lista di espera di Respaldo ta largo y ta bay sigur te cu un aña.

   UO AZV no a presupuesta e ayudo pa e grupo aki. Respaldo a puntra Minister pa entrega un peticion na Reino pa ayudo. Door di no corta den e cuido di salud mental nos por evita mas cu ta posibel tragedianan similar na esun di awe di sigui sosode.