Te otro aña Conseho Supremo na Hulanda lo trata apelacion Caso Avestruz

Decision tuma e siman aki a duna indicacion

ORANJESTAD (AAN): Despues cu Diamars  Conseho Supremo na Hulanda a dicidi cu e casacion den caso Avestruz ta sigui, esaki ta duna indicacion cu otro aña 2026 lo por spera cu Conseho Supremo na Hulanda, unda 6 Hues, lo bay trata e apelacion sentencianan di Hof di caso Avestruz di L. Arends, B. Sevinger y P. Sussebeek.

   Diamars Conseho Supermo di Hulanda a informa abogadonan di L. Arends, B. Sevinger y P. Sussebeek cu a dicidi cu e casacion ta sigui y a instrui Procurador General pa tuma un decision con Conseho Supremo mester evalua e caso. Despues di algun luna Conseho Supremo lo dicidi y lo fiha fecha pa tratamento di e caso.

   Despues di mas cu 1 aña: Aña pasa 12 Juli 2024, Hof (tres Hues) di Corte Superior, a dicta sentencia den e caso Avestruz, caminda 4 sospechoso, Werleman, Nuñez, Mansur y Harms a worde declara liber, mientras cu P. Sussebeek, L. Arends y B. Sevinger a worde condena. Ta asina cu P. Sussebeek, L. Arends y B. Sevinger a apela e sentencia caminda awor Conseho Supremo na Hulanda, lo bay evalua e caso.

   Cuater acusado declara liber: Hof a cuminsa cu Werleman, Nuñez y Mansur. Hof a rechaza e defensa cu a persigui nan y no otronan. Hof ta haya cu ta keda na Ministerio Publico pa dicidi kende ta persigui. Hof a bisa cu e no ta haya cu tin malversacion di Gobierno cu e terenonan cu a bende pa hopi placa. No por bisa cu nan tres no kier a desaroya nan proyectonan. Hof a bisa cu Mansur por a haya financiamento di su famia. Hof no ta haya proba cu conhuntamente cu Sevinger a malversa Gobierno. Hof a declara Werleman, Nuñez y Mansur liber di malversacion di Gobierno.

   Hof a bisa cu Harms a haci donacionnan na Fundacion Curazon Berde di Sevinger. E pregunta ta si esaki por ser considera cumpra. Na opinion di Hof, no tin suficiente prueba cu e donacionnan ta relaciona cu dunamento di tereno. Hof a declara Harms liber di e acusacion di a cumpra Sevinger.

   Hof a bisa cu Ministerio Publico tin oportunidad di apela na Corte di Casacion, caminda 6 Hues lo bay evalua e caso.

   Sussebeek condena pa cumpra Sevinger y laba placa: Hof a bisa cu nan ta haya cu Sussebeek a duna regalonan na Sevinger y labamento di placa. Hof ta haya cu Sussebeek a cumpra Sevinger door di laga traha heki na su cas, pone un gym y cumpra drip system. Hof ta haya cu Sussebeek a haci esaki pa logra cu Sevinger lo pasa terenonan. Ta un hecho cu companianan di Sussebeek a paga pa e cosnan. Hof a bisa cu nan no ta kere cu Sevinger lo a paga back.

   Hof a mustra cu den e mesun periodo, Sevinger a haya peticionnan di Sussebeek pa terenonan y Sevinger a aproba nan. Hof ta haya cu Sussebeek a laba 1.3 miyon dollar door di bende un tereno cu el a haya di Sevinger.

   Pa cu e castigo, Hof a bisa cu Sussebeek a cumpra Sevinger pa haya terenonan. Hof ta haya esaki un asunto serio. Hof a tene cuenta cu e caso ta bieu y cu Sussebeek tabata den mal publicidad. Hof a condena Sussebeek na 30 luna (2 aña y 6 luna di prison) di cual 10 luna ta condicional cu un tempo di prueba di 3 aña. Hof a dicidi cu e 1.3 miyon dollar lo keda confisca.

   Arends condena na 2 aña di prison: Hof a bisa cu Sevinger y Arends conhuntamente a traha pa duna terenonan na Arends. Arends a haya terenonan sin cu e tabatin intension di realisa proyectonan. Arends tabatin relacion politico cu Sevinger y tabatin acceso na Sevinger. Hof a bisa cu Sevinger tabata firma e peticionnan di Arends pa worde realiza. Arends a haya un decreto ministerial pa asina haya terenonan.

   Hof ta haya cu Arends a cumpra Sevinger pa tereno. Hof ta haya proba cu Arends a manda placa den envelop pa Sevinger. Hof a mustra riba declaracion di e testigo Roga cu a hiba e placa y a papia cu ta festia tin di tereno. Hof a bisa cu nan no ta kere Arends cu e envelop tabatin ticketnan di loteria. Hof a mustra cu Arends a keda desmenti di a manda Roga cu envelop ten a momento cu e señora di Sevinger a declara cu Roga a hiba un envelop p’e.

   Hof a condena Arends na 2 aña di prison di cual 1 aña ta condicional cu 3 aña di prueba. Hof a bisa cu e no ta mira necesidad di pone un multa manera PG a exigi.

   Hof a subi castigo pa Sevinger: Hof a bisa cu e ta declara Sevinger liber di a worde cumpra cu e proyectonan Werleman, Nuñez, Mansur, y Harms.

   Hof ta haya Sevinger culpable di malversacion y a laga su mes worde cumpra. Hof a mustra cu e fundacion di Sevinger a haya placanan y Sevinger a malversa placa di e fundacion.

   Pa cu e castigo, Hof a bisa cu mester manda señal bon cla cu corupcion no ta acceptable y tin castigo pisa pa esaki. Hof ta haya cu Sevinger a abusa di su posecion como minister.

   Hof a condena Sevinger na 4 aña di prison, di cual 1 aña ta condicional cu 3 aña di prueba. Tambe Hof a prohibi Sevinger pa 5 aña e no por participa como politico den eleccion.

   Riba Diamars dia 27 Januari 2026, Conseho Supremo lo tuma decision y lo haya sa ki dia lo tin tratamento di e caso den Corte Supremo na Hulanda.