Ta renovando casnan di antaño embeyeciendo e Distrito di Savaneta

​

Norman Thijsen y Fundacion Savaneta ta hopi contento:

ORANJESTAD (AAN) – Norman Thijsen, di Fundacion Savaneta, den entrevista cu DIARIO a splica tocante e proyecto di renovacion di cuatro cas cu nan ta ehecutando actualmente, den e Distrito, y cu a cuminza for di aña pasa caba.

Thijsen a declara cu loke nan ta haciendo ta hopi importante y esaki ta den cuadro di e meta pa cual e fundacion a lanta, p’asina preserva e balor historico. E fundacion ta enfoca riba casnan di antaño cu tin entre 80 pa 100 aña, y ta den nan forma tradicional. “Nos ta renova, no ta restaura pasobra esey ta trabao di Fondo di Monumento cu nan ta haci autenticamente. Nos ta renova dunando un color hopi bibo, pa embeyece e cas, e caya y e distrito. Asina nos ta traha riba e identidad cultural di Savaneta”, Norman Thijsen a trece dilanti.

Norman Thijsen ta contento cu e fundacion ta conta cu tres sponsors, dos ta for aña pasa y un ta nobo. Un di e sponsors, por cierto, ta Setar NV.

El a comenta cu tres di e casnan aki ta di estilo tradicional, un di nan ta data di aña 1898, otro ta di aña 1940, e tin 80 aña y no ta den su forma full tradicional, pero e fundacion a dicidi di duna un man riba dje, den e parti di embeyece Savaneta.

See also

Local News

Colegio Arubano ta celebrando 65 aña di existencia

Thijsen a splica cu nan tin diferente manera pa traha. Nan ta traha como boluntario, no tin payroll ni ta haya subsidio di ningun instancia, sino cu ta recauda fondo por medio di actividadnan y cu sponsors cu ta kere den nan vision y ta para nan tras, pasobra nan sa cu loke e fundacion ta haciendo ta importante. Un di e casnan ta banda di San Luis Deportivo y ta wordo geverf y e bunita ta cu e club di futbol San Luis Deportivo ya a asisti cerca e fundacion pa duna nan un man, pa verf e cas. Asina nan ta crea un proyecto unda e comunidad tambe ta bay duna un man den dje. Nan tin un sentido di cooperacion unda un ta yuda otro, tambe Mariniers Kazerne y pronto lo mira nan ta verf cas tambe na Savaneta, y asina a crea un partner social. E Fundacion ta asina contento pasobra tin hopi hende ta kere den e proyecto.