Ta cuestiona si un minister tin autoridad pa cera algo publico na Aruba

Señor Frans Ponson di CUA:

ORANJESTAD (AAN): Ta algo hopi alarmante pa laga un minister dicidi cu e ta cera nos beachnan un dia pa luna, segun señor Frans Ponson  di Comerciantenan Uni Aruba (CUA). Segun señor Ponson, den e mesun rosea cu Minister di Turismo Wendrick Cicilia ta papia cu e kier duna nos sistema marino un descanso, e ta admiti cu nos beachnan ta e recurso economico mas grandi cu nos pais tin. El a agrega cu ta e mesun gobierno aki cu antes a duna permiso pa hotelnan ta riba nos beachnan blanco, awo kier duna nos beachnan un descanso. 

Señor Ponson den un encuentro cu prensa, a cuestiona e base legal cu Gobierno tin pa tuma e decision pa duna nos beachnan un descanso. Si e ta algo simbolico cu tin sentido of no. El a menciona cu for di institutonan cu ta haci e tipo di investigacionnan aki, ta comprende cu un dia lo no tin sentido. 

E pregunta ta keda, segun señor Ponson, con nos ta pensa di cera un dia di beach mientras turismo ta aumentanto den cantidad. Con lo maneha e cantidad di turismo pa e dia cu beach ta cera? Con ta bay haci propaganda cerca e turista cu ta bin pa hospeda na hotelnan banda di beach y cu ta paga hopi placa y mester bisa nan cu riba cierto dia nan no por cana riba nos beachnan. E peliger di esaki ta, cu ora turistanan ta aki y ser avisa cu nan no por bishita nos beachnan riba un dia, nan por tuma nan cellular y haci mal propaganda pa Aruba. 

Sinembargo, segun señor Ponson, e pregunta cardinal ta si e minister en cuestion tin autoridad pa cera algo publico na Aruba. El a menciona cu e gobierno anterior a cera nos pais riba un base di un ley di emergencia pa motibo di e pandemia di Covid 19. Actualmente, no tin un ley ni un caso di emergencia. 

“Nos tur ta di acuerdo cu mester proteha nos beachnan pero mester haci esaki conscientemente. Si nos ta laga un minister lanta mainta cu gana di cera algo publico pa un dia y tuma autoridad sin base legal, nos no por lamenta ora cu e kier haci esaki tur siman. E ora por bin un otro minister cu ta lanta un dia y bisa cu e no kier buelo drenta Aruba un diadomingo pa luna”, el a expresa. 

Tambe e ta cuestiona kico lo pasa riba e un dia ey cu esnan cu tin negoshi banda di lama. Segun el a menciona, tur e companianan aki mester cera. “Nos ta gewoon cera sector priva pasobra un hede kier? E ta algo alarmante. Nos ta pensa cu Gobierno mester bay sinta cu departamentonan concerni pa hunto bin cu algo consciente. Gobiernonan mester traha hunto y no den cada gobierno un minister ta haci loke cu e kier. 

“Esakinan ta cosnan descabeya den nos pensamento y nos mester bira mas reponsabel den tuma decisionnan cu di berdad ta yuda pais Aruba y no algo simbolico cu no ta haci cosnan grandi financieramente pero riba dje ta perhudica hopi compania, nos turimso y nos pais.