The content originally appeared on:
Diario
Homber G.L. deteni pa caso serio aki
ORANJESTAD (AAN): Tabata Diabierna mainta pa 6:55 am, cu Central di Polis a manda patruya di San Nicolas rumbo pa un cas na Brazil, unda e conocido di husticia di inicial L. ta biba. Autoridad a bay eynan, debi cu e persona a dicidi na pone obstaculonan riba caminda publico, cu ta strobando trafico cu ta bayendo Scol SPO na Brazil.
Na momento cu Polis a yega na e adres, nan a baha pa papia cu e homber di inicial L. aki. Pero pa un motibo of otro, e no kier razona cu autoridad riba loke e ta haciendo. E ta un persona cu ta gusta pone bloki riba caminda, y tin biaha den pasado tabata tira piedra riba autonan tambe cu ta pasa eybanda. Na dado momento, e agentenan a dicidi cu nan ta detene e homber.
Pero e homber L. tabatin otro meta! Pues mesora el a mustra cu ademas di no kier razona, e no kier coopera tampoco pa su aresto.
Pues el a cuminsa resisti cu Polis, y dado momento a rek un careda na pia y core bay direccion un parti di su cas na unda el a habri e porta patras, y manda su 4 cachonan riba e agentenan policial.
E cachonan a ataca e agentenan na forma feroz, y ambos a ricibi multiple mordi di e animalnan. Esaki a forza cu na dado momento un di e polis a hay’e ta saca su arma di candela, y los un tiro di den laira na unda e cachonan a core bay bek den e cura na unda nan tabata cera. E dos agentenan mesora a solicita refuerzo, pues a pidi pa mas unidad di Polis. Cu mas yudansa di agentenan, porfin a logra detene e homber G.L. di 29 aña di edad.
A manda busca Vehiculo di Transporte, cu a hibe rumbo pa Warda di Polis, unda el a ser presenta dilanti Fiscal Auxiliar. El a dicidi cu e sospechoso ta keda deteni cu acusacion pisa contra su persona pa loke el a haci. Pues e lo bay ta pasando sigur full su Semana Santo den cel encarcela.
Ambulans tambe a yega, y e dos agentenan a wordo hiba Servicio di Emergencia na ImSan pa ricibi asistencia medico pa diferente mordi na nan curpa, di cual varios tabata sangra. A ricibi hangua tambe contra cualkier malesa cu e cachonan lo por tin.
Vocero policial Liliana Rasmijn a splica cu e caso aki di Diabierna ta uno hopi serio na unda cu Cuerpo Policial no ta acepta den ningun manera pa uza un bestia/ hende of obheto pa agredi un agente policial den su trabao.
