SNBA a haya invitacion di Comision di Parlamento tocante vision San Nicolas

Errol de Freitas, Presidente:

ORANJESTAD (AAN) -- Presidente di San Nicolas Business Association, den entrevista cu DIARIO a duna di conoce, cu SNBA a haya un yamada di e Secretaria di Parlamento, pa nan asisti na e reunion cu a caba di tin cu e Comision di Parlamento.

   Un reunion basta interesante presidi pa Parlamentario, señora Shailiny Tromp, di Fraccion di MEP. E dama aki a pone un prome reunion cu a tuma lugar dia 3 di December ultimo, den cual nan a presenta nan vision, den presencia di tur Parlamentario.

   Presidente di SNBA a expresa cu unda cu nan por yuda tocante e aspecto di vision pa San Nicolas, nan ta bay.

   El a señala cu e reunion tabata fructifero y interesante. “Tur reunion ta interesante pa mi ora pa progreso di nos distrito. Awo, e otro banda di medaya, ta cu despues nan tabata tin e representantenan di Real Estates cu arkitectonan, y esnan cu ta trahando un proyecto na San Nicolas, cu ta pega haci casi dos aña eynan. E ta imagina su mes cu ta for di e Rental Commissie y e permisonan cu mester yega di DOW.

   “Anto ami no ta bisa e hendenan aki, ki sorto di ‘time line’ nan pone, pero dos aña ta hopi. Y no tin un situacion cu guynan aki. Nan a acerca nos bek pasobra nos tabata tin e inversionista cu a haci e tereno accesible pa nan duna e stap pa e prome 63 casnan pa San Nicolas. Nan ta basta luhoso y e prijsnan ta pagable, no ta co’i loco, nan por! Nan tabata pre-aproba door di un banco local caba. Mi ta bira bisa, nos tin un situacion na unda e doño di e tereno a hala atras pasobra el a cansa di warda. Mi ta spera cu nada no bin, pasobra ami ta intermediando, anto mi tin te 23 di Februari, pa haya sikiera un letter of intent, pa wak sigur cu gobierno por trece tur esaki hunto y e ora ey ta bira un otro caso!”, de Freitas a subraya.