The content originally appeared on:
Diario
Belasting lo mester subi na Hulanda y gastonan lo mester baha
*Base Presupuesto Hulandes pa 2025 a bira parti di formacion
*Politiconan prominente no a basa promesa riba realidad financiero
ORANJESTAD (AAN) — Si Hulanda y asina Reino Hulandes, ainda no tin un Gobierno nobo a base di e resultadonan di ultimo eleccion, cu a tuma lugar pa motibo di salida prematuro di Gobierno Mark Rutte, ta debi na e problema financiero di Gobierno Hulandes.
Pa Aruba asina un situacion sumamente interesante ta presenta su mes na momento cu tuma nota cu ya e gobernantenan di Reino cu mester bay cas ora yega na un Gobierno nobo, ta papia di un suma di placa importante cu ta necesario pa cubri e gastonan di Gobierno di Reino cu su entradanan.
Intentonan pa yega na un Gobierno nobo a continua cu dos Informador cu awor ta heredero di e intentonan anterior di informadornan pa forma un Gobierno, cu prome a wordo considera como dificil pa motibo di e hecho cu e ganador di eleccion Hulandes, Geert Wilders, ta wordo considera un figura politico problematico, pero despues a wordo identifica como problema pasobra Gobierno di Reino no tin placa.
E Informadornan nobo, Dijkgraaf y Van Zwol, mester a admiti despues di nan prome dia di intento pa yega na un Gobierno Hulandes nobo, cu nan trabou ta dificil pa e simpel motibo cu no tin placa.
Un realidad cu riba su mes no ta nada nobo ya cu for di November 2023 a bira conoci, cu mester a baha tur e gastonan pasobra Reino no tin suficiente placa.
Resultado di e problemanan financiero di Reino Hulandes ta, cu mayoria di e Ministerionan Hulandes mester a baha nan gastonan cu un total di 4.5 Miljard Euro, loke a haci cu nan no por a ehecuta tur nan plannan.
E hecho cu na 2023, Gobierno Hulandes a ricibi 4.3 Miljard Euro menos cu el a spera, tabata debi na e hecho cu economia no a crece manera a wordo spera y na e hecho cu menos placa a drenta caha di Gobierno Hulandes, cu a wordo spera.
Mundo politico Hulandes ta den un situacion financiero grave mientras e fecha cu cifranan oficial di 2023 lo bira conoci, ta cada rato mas cerca.
Na Mei 2024, Gobierno Mark Rutte mester entrega Tweede Kamer Hulandes e relato annual di 2023 y asina Reino lo tin e contesta directo kico a pasa cu placa y kico por spera.
Mientrastanto mester forma un Gobierno nobo.
Si na 2023 den mundo politico Hulandes tabata tin hopi interes pa participacion na eleccion y partidonan nobo a mira luz, e problemanan financiero a haci cu participacion den Gobierno, si a bira asunto riesgoso.
Pa haya mas comprension pa loke ta stroba formacion di un Gobierno nobo pa Hulanda y Reino Hulandes, awe pues e informanan nobo lo ricibi tanto e Ministro Hulandes como e Secretario di Estado Hulandes pa Asuntonan Financiero pa cera conoci cu e realidad financiero di Hulanda.
Manera DIARIO algun tempo pasa ya a anuncia, a keda establece pa un grupo di trabou cu e Gabinete Hulandes nobo mester di un suma di 17 Miljard Euro pa por cubri gastonan.
E pagador di belasting na Hulanda lo mester paga pa esaki of Gobierno di Reino mester economiza di tal forma, cu e ta evita cu e tin un fayo di mas cu tres porciento riba su Presupuesto, manera ta acorda den seno di Union Europeo.
Mientras Hulanda ya enfrenta problemanan serio, e promesanan di politiconan Hulandes, aparentemente no tabata tin un base riba calculacionnan oficial di instancianan oficial.
Ni e partido cu a gana eleccion, e partido di Wilders (PVV) ni e partidonan nobo cu ta BoerburgerBeweging (BBB) pa no papia di Pieter Omzigt cu a pensa cu e ta gana eleccion, no a busca informacion cerca instancianan oficial ora nan a haci nan promesanan di eleccion.
E pregunta grandi ta keda, manera DIARIO a adverti for di 2023, kico e situacion na Hulanda lo representa pa Aruba.
Kico lo pasa cu cifranan calcula dor di Gobierno di Reino mientras gastonan di entre otro Defensa, sigur ta mustra den direccion di inversionnan importante debi na e situacion di guera?
Manera DIARIO a splica basta dia pasa, Arubianonan biba na Hulanda mester sigui e desaroyonan.
E formacion di un Gobierno nobo, despues di cuatro Gobierno di Mark Rutte cu a introduci supervision financiero na Aruba, ta bira sumamente interesante.
Politiconan lo dicidi pa gastonan di Pueblo subi of nan lo dicidi pa eleccionnan nobo si atrobe formacion di Gobierno no ta posibel?
E negociacionnan actual cu Informadornan nobo, mester duna un contesta!
