Sindicato TOPA ta comparti dolor di trahadornan cu por a perde trabao of ta bibando cu menos entrada

ORANJESTAD (AAN): Rene Bernabela, president di sindicato TOPA kier a informa nan miembronan cu recientemente Gobierno a reuni

cu 15 sindicato pa trata e asunto di e 12.6 % inkorting di salario. Durante e reunion aki e Departamento di Finansas a duna un presentacion di e situacion financiero di pais Aruba y a ilustra e crisis cu un resultado devastador pa nos pais.

            Sr. Edwin Jacobs di SVb tambe a duna un presentacion di e gastonan di cuido di salud. Minister President a referi na e impacto cu Covid 19 tabatin riba nos pais. Segun e prome analisis di IMF, Aruba ta un di e paisnan mas fuertemente afecta den e region.

            Segun Gobierno door cu a actua hopi lihe y ta danki na e decisionnan y accionnan rapido di Gobierno, por a duna sosten financiero na esnan cu na e momento ey a perde trabou of tabata core e riesgo di perde trabou.

            TOPA ta comparti e dolor den cartera di e trahadornan, ya cu tur, pa un of otro motibo cu lo a perde trabou of cu ta bibando cu menos entrada, esaki tin su efectonan cune. TOPA a duna di conoce, manera tur otro sindicato tambe a hasi, cu no ta suficiente pa bin duna un presentacion di AZV of di e situacion financiero di pais Aruba. TOPA lo tabata desea di sa kico ta e maneho financiero economico y riba e tereno laboral.

            Gobierno a duna di conoce cu pa gran parti di likides mester duna danki na Hulanda y cu desde april aña pasa te cu awo ta suma na 904 miyon florin. Gobierno a duna di conoce cu pa loke ta trata “Loonsubsidie“ y e sosten financiero na midden en klein bedrijven, a wordo cubri di e sosten di likides aki. Tambe a bin cu e Proyecto di “ FASE “ cu a wordo cubri danki na e aporte di solidaridad di empleadonan publico y semi publico, cu Gobierno a keda hopi agradecido.  Gobierno a continua bisando cu pa e kwartaal aki tin un necesidad di likides di 85 miyon y aki Gobierno ta diferencia di opinion cu CAft. Segun CAft cu Aruba no mester di e placa e kwartaal aki.

            Gobierno a pone e sindicatonan na altura cu tin pensa di entrega 6.3% di e inkorting na aña 2022 y e otro 6.3% na aña 2023. Ariba e punto aki gobierno di Aruba ta den deliberacion cu gobierno Hulandes, pa motibo cu ta gobierno Hulandes a pone e condicion di e inkorting di entrada di e ambtenaarnan y empleadonan den sector semi publico. E condicion aki a wordo poni pa haya e sosten financiero y e ta “ Tot Nader Orde “.