The content originally appeared on:
Diario
ORANJESTAD (AAN): Informacion for di Bonaire ta indica cu Diabierna atardi a finaliza e asina yama “Curso Sindical Basico”
organiza conhuntamente door di sindicato AFBW di Bonaire y Centro di Formacion (CENFOR) di Sindicato FTA di Aruba.
E curso a dura tres dia, y a atende varios tema esencial cu ta importante pa e rol di un Shopsteward den un organizacion caminda tin representacion di Sindicato. E curso a crea discusionnan entre grupo, caminda a practica diferente escenario unda por contesta preguntanan relaciona cu e tema “Kico ta Sindicato”. Pero a enfoca riba temanan mas amplio tambe, manera historia sindical, filosofia sindical, ideologia sindical, etica sindical, y mas.
Merecidamente tur participante a ricibi nan certificado como prueba cu nan a completa exitosamente e curso di 3 dia. Un pabien pa cada un di e miembronan di Sindicato cu a participa activamente y cu hopi entusiasmo na e evento di formacion aki.
E cursonan a wordo duna door di Hubert Dirksz y Tyrone Bremo di CENFOR di FTA, y a teni na Divi Flamingo Resort na Bonaire.
