‘Si OM ta corecto, tur politico desde 1986 mester wordo persigui pasobra nan a purba yuda hende’

Otmar Oduber:

*Diabierna lo desenmascara tur punto di OM 

ORANJESTAD  (AAN): Despues cu Dialuna mainta fiscal a exigi un castigo di prison incondicional di 3 aña contra lider di PPA Otmar Oduber, Diamars mainta el a tene un conferencia di prensa, pa reacciona riba esaki.

Oduber a cuminza na bisa cu for di 1 aña pasa caba el a indica cu e lo hiba su defensa den pueblo pa tur hende por sigui e pasonan di locual ta tumando lugar.

“Mi ta contento cu despues di mas cu 5 aña porfin Ministerio Publico a sali afo, sinembargo locual a wordo treci dilanti Dialuna di parti di e vocero di OM, tabata bastante bruha”.

El a pega hopi den su declaracion y esey naturalmente ta pasa ora cu ta pone cosnan pa dilanti cu naturalmente no ta cuadra cu realidad, segun e lider politico.

El a sigui bisa cu no ta un casualidad cu e caso ta tumando lugar na e momentonan aki.

Segun Oduber, e influencia cu OM kier tin riba e sistema democratico di nos pais ta bisto.

El a splica cu no ta berdad si cu e caso contra dje lo tuma lugar riba dia di eleccion.

“Ministerio Publico a pidi un castigo di 3 aña contra mi, pero mi ta sigui respeta y kere den nos sistema hudicial, den e imparcialidad cu tin cerca e hueznan”.

Lamentablemente mi no por papia mescos pa OM.

Ministerio Publico a dura 5 aña y algun luna pa loke ta nan investigacion y mi ta kere cu nan a gasta entre 8 cu 10 miyon florin den e caso aki, segun Oduber.

El a trece dilanti cu ora cu Dialuna finalmente a presenta e supuesto pruebanan contra dje, tur e prome acusacionnan contra dje no tey mas, incluyendo e acusacion di labamento di placa, bendemento di tereno comercial, forma parti di un organizacion criminal y cu e lo a enrikece su mes cu cierto fondo.

“Ayera pueblo di Aruba por a wak cu Otmar a papia e berdad y cu nada di e acusacionnan ey ta berdad”.

Awor a para bira cu si e politico, Otmar den e caso aki, conoce un hende, of si un persona den pasado a vota pa partido POR, esey ta motibo e ora ey pa bo persigui un politico, segun e lider di PPA.

El a sigui bisa cu esaki ta un hilaridad y lo nifica cu e mensahe cu a sali for di Ministerio Publico Dialuna ta cu eingelijk cuminzando for di 1986 te cu awe, mester pasa piki tur minister y cera hende, pasobra tur politico conoce un hende na Aruba, a papia cu un hende y a scucha su problemanan, primintiendo e persona cu e lo haci su best pa yuda nan.

“Esey mi ta haciendo atrobe, scucha hende y wak con mo por yuda nan, pasobra e politico tey pa presenta su plan y su vision y pa trece solucion y yuda comunidad”.

Topa un hende, bise cu bo ta bay yude cu su problema y ‘follow up’ pe, no ta nada robez si bo no a bay contra e reglanan y leynan existente, pa por beneficia e personanan aki.

“Pues mi no ta wordo persigui pasobra mi a haci algo ilegal of por ehempel a tuma placa, sino pasobra un pe

Pa loke ta e acusacionnan contra mi di entre otro ladron , unda cu mi lo tabata tin 5 miyon dollar na un cuenta na Panama, nada no a resta.

Awor nan ta acusa Otmar cu e lo a duna 1 tereno den e 1800 terenonan cu a wordo otorga door di dje na un persona cu e conoce, di cual el a bay su bruid y ta biba cerca di dje y a lanta cune.

Esey ta e motibo cu ta persigui Otmar awe, segun Oduber.

“Pues mi no ta wordo persigui pasobra mi a haci algo ilegal of por ehempel a tuma placa, sino pasobra un persona cu a haya un tereno ta amigo dimi”.

Si ta asina e ora ey na Aruba tur politico di tur partido lo mester wordo persigui y cera.

Esaki segun Oduber, kende a indica cu su defensa Diabierna lo desenmascara cada un di e puntonan treci dilanti pa OM.

El a splica cu tur punto treci pa OM ta suposicion, sin ningun prueba.

“Manera cu OM ta opera, a para bira awor cu su bo a forma parti di un partido politico y apesar cu bo a cana segun tur regla, bo no mag di yega na remarke pa haya un trabao durante e periodo cu e partido tabata na mando”, segun Oduber.

El a duna un otro splicacion pa ilustra dicon e ta haya cu e  maneho di OM no ta cuadra.

“Si AVP por ehempel tin 22.000 miembro registra, esey lo nifica cu si ta pa OM, ningun di e personanan aki tin e derecho di por ehempel haya un tereno, pasobra AVP ta na mando”.

Esaki ta algo ilogico, segun e lider di PPA.