Setar NV ta conectando Aruba cu algun sorpresa den cuadro di nan 40 aña di existencia

Anuncio grandi di Setar NV

• Data speed na casnan lo subi pa minimo di 400 Mbps 

ORANJESTAD (AAN): Dialuna atardi durante un conferencia di prensa convoca na Conexion Center di Setar NV na Sero Blanco, a haci anuncio grandi relaciona cu e di 40 aña di existencia di e compania nacional di telecomunicacion.

   Director Roland Croes di Setar NV, hunto cu Ministro Rene Herde, den presencia di diferente gerente di e compania, a anuncia cu nan ta bin cu extra beneficio na nan clientenan rond Aruba.

   Setar ta celebra 40 aña conectando Aruba! Despues di cuater decada di innovacion y servicio y invertiendo den Aruba, e compania lo celebra e logro aki cu un anuncio special:

   Anuncionan special: Setar NV cu anuncio grandi, cu nan ta bay aumenta Speed di Data pa minimo di 400 Mbps pa tur clientenan residencial cu paketenan regular.  E compania a bisa cu entrante 2 di Februari 2026, esaki ta socede pa tur hende.

   Tambe pa Setar NV ta importante pa anuncia, cu pa aña 2027 absolutamente ta tur cas y negoshi lo tin acceso na Fiber, creando e base pa Smart Homes, companianan mas competitivo y crecimento economico digital.

   Otro anuncio ta cu awor ya caba e sistema di mobil 5G oficialmente ta na Aruba: Mas cu mita di Setar su clientenan tin 5G caba.  Via bo smartphone bo tin velocidad mas rapido di data mobil.  Pues e ta e proximo generacion di conectividad mobil cu speednan mas halto.

   Mas cu Telecomunicacion, SETAR ta expande como proveedor di servicionan digital y IT cu solucionanan cloud-based, automatisacion y AI pa companianan y gobierno.

   Gerencia a splica cu pa nan comunidad tambe, nan tin algo special.  El a splica cu Setar NV ta añadi mey miyon extra den presupuesto di donacion pa sponsorship y proyectonan den Educacion, Cultura, Deporte y Social.

   Masha danki Aruba pa 40 aña di confianza! Hunto SETAR ta sigui conecta, innova y empodera tur habitante riba e isla.