Serlimar ta recomenda cu si bo tin basta sushi mihor bo keda cu 2 baki

Serlimar lo no recoge saconan banda di bari

ORANJESTAD (AAN): Diahuebs mainta Serlimar a tene un conferencia di prensa den cual e relacionista publico Jermaro Emerencia a duna informacion general di e compania.

   El a cuminza na papia riba un special cu Serlimar tin pa loke ta temporada di campamento.

   “E campaña ta encera 10 florin pa full e temporada di campamento”. Esaki ta core di 10 di April te cu 24 di April.

   Bo por pasa paga na nos oficinanan na MFA Paradera y na Kockstraat 4, of bo por manda un email tambe, segun Emerencia.

   El a papia tambe riba e asunto di barinan, unda cu el a splica cu for di Februari ora cu Serlimar a cuminza na recoge barinan (toter) y e clientenan a cuminza ahusta na e cantidad di bari cu nan tin mester pa cas, Serlimar a ripara cu tin hendenan cu a entrega 1 baki (toter) y a keda cu solamente uno, pero toch tur siman e trahadornan di Serlimar ta ripara cu na e casnan tin 1 baki yen y dos of mas saco di sushi benta na banda.

“Nos ta pensa cu si bo acumula mas sushi cu solamente e 1 bari, e ora ey 2 baki ta necesario pa bo cas”.

Nos no por bay piki e dos saconan di sushi cu ta na banda di e bari y pesey nos ta ricibi yamadanan di keho.

Pesey nos ta conseha cu si bo tin dos bari, pa bo keda cu tur dos, segun Emerencia.