The content originally appeared on:
Diario
MiamiCup 2024
ORANJESTAD (AAN): Manera cu DIARIO a trece den edicion di Dialuna caba, e team fantastico di Aruba, ASA Elite Sub-12 ta na Florida pa competi den MiamiCup 2024. Nan ta hungando den Sub-12 Grupo A, den cual tin participacion di cinco team di Merca, un team di Chile, un team di Rep. Dominicana, un team di Aruba, un team di Puerto Rico, un team di Honduras, y un team di Colombia.
Riba Dialuna mes nan a start sali victorioso ganando e team “Jogo Bonito Academy” di Merca cu score di 10-0.
Diamars nan a subi tereno atrobe na Kendall Soccer Park, y a enfrenta e team di Homestead Makos di Merca.
E team ASA Elite di Aruba, hungando den nan nivel halto y cu mentalidad di ‘Titans’ ta sigui su caminda victorioso ganando Homestead Makos USA cu score di 3-0.
ASA Elite a mantene e presion y cu insistencia di e team a gana e wega cu e prome goal di Bradley Maduro den e prome 14 minuut, sigui inmediatamente pa un goal di Owen Vieira, y posteriormente otro goal mas di Bradley Maduro cu a permiti otro triunfo pa ASA den e MiamiCup 2024.
Aruba, cu su ASA Elite team sigur ta sobresali den e torneo aki di World Soccer Foundation na Miami, Florida.
Cu e victoria aki, den Grupo A di Sub-12, tanto e team di Aruba y esun di Honduras ta na cabez cu 6 punto cada uno. Despues ta sigui team di Homestead Makos cu 3 punto. E team di Jogo Bonito Academy di Merca tin 0 punto, como tambe e team di Republica Dominicana tin 0 punto.
Hoben nan talentoso aki di ASA Elite Team Aruba, cu head coach Kike Japonza y assistente Bryan Maduro ta hungando cu passion y tin e meta pa hiba e copa pa Aruba!
