The content originally appeared on:
Diario
Mesun tipo cu esun recien manda di Aruba pa Hulanda den container
Pakinan cu e nomber y logo “NBA” riba dje
ORANJESTAD (AAN): Apenas dos siman pasa, autoridadnan di Waf di Rotterdam na Hulanda a bin descubri un cargamento di 44 paki di cocaina scondi riba e freezer evaporator coil di un container desconecta cu a wordo manda for di Aruba pa Hulanda. Ora cu a habri e tasnan, a identifica tur paki cu e emblema di “NBA Neuchatel Basket Association”. Esaki ta un forma cu cartelnan di droga ta identifica nan producto.
E 44 pakinan di cocaina aki a wordo confisca, y detaye di e paki cu imagen a wordo divulga pa asina pueblo por mira nan.
Mesun paki na Venezuela: Awor den fin di siman aki, informe di Venezuela ta indica cu oficialnan di Guardia Nacional Bolivariana (GNB) a bin descubri e lote di mas grandi te ainda pa estado Falcon.
A bin haya varios bulto riba Diasabra marduga na oriya di lama na beach di Boca de Aroa, cerca di un pasiyo, na municipio Silva di estado Falcon. Esaki ta apenas 35 km noordwest di Puerto Cabello.
E grupo di GNB na estado Falcon, bao comando di general di brigada Juan Campos, kende ta comandante di Comando di Zona 13, a actua bao supervision di comandante di e Zona Operativa di Defensa Integral Falcon, na encargo di general di division Felix Arnos Rodriguez.
E droga cu a wordo haya na oriya di lama, a yega na un peso di 374 kilo. E pakinan tabatin logo tambe di “NBA Neuchatel Basket Association”. Esaki ta mesun cu a wordo manda for di Aruba pa Hulanda, y descubri dos siman pasa.
Cada paki tabatin un peso di 1,15 kilo, y a test positivo pa cocaina. No ta conoci pa unda e droga aki ta destina, pero riba caya na Merca e 374 kilo aki tin un balor di 11,0 miyon Dollar.
Autoridadnan a sospecha cu e boto cu ta moviendo e droga aki, lo ta den un zona di costa di municipio Silva of tambe na estado Carabobo.
Cu e 374 pakinan aki, estado Falcon a yega awor pa aña 2024 na un total di 914 paki confisca.
