The content originally appeared on:
Diario
Parlamentario Marco Berlis (MEP):
ORANJESTAD (AAN): Diahuebs 30 di mei lo tin e reunion publico cu lo trata e ley pa pasa tres plantanan di RWZI, e sistema di riool di Aruba, e incinerator y tur lo demas pa e entidad nobo di AWSS. AWSS (Aruba Wastewater Sustainable Solutions N.V.) lo bira cay directamente bao di Utilities mescos Elmar y WEB Aruba N.V.
Esaki ta un paso historico, mirando cu nos pais apenas a sali dos aña for di pandemia di Covid, y awo a traha un plan pa asina porfin Aruba por conoce un planta nobo di RWZI na Bubali cu lo ta basta mas grandi cu esun actual. E planta actual tin hopi ekipo cu a daña y e ta asina bieu cu ni e piesanan ta wordo traha mas. Esaki ta haci’e un planta obsoleto, cu tur consecuencia pa pais Aruba y su turismo.
Un poco di e historia di RWZI
Bubali: construi na 1972, cu un capacidad di procesa 4500m3/dia.
Parkietenbos: construi na 2007, cu un capacidad di 1500m3/dia
Zeewijk: construi na 2008, cu un capacidad di 500m3/dia.
Timeline / Historia
Na 1995 a haci e prome renobacion: primary, secondary y advanced upgrade na RWZI Bubali.
Na 2007 a haci e di dos renobacion: Primary and advanced treatment upgrade.
Na 2007 tambe a pone den funcion RWZI Parkietenbos. Na 2008 a pone den funcion RWZI Zeewijk. Na 2009 Witteveen+Bos a recomenda pa cuminsa procesa e sludge na Parkietenbos.
Na 2014 Witteveen+Bos a recomenda un aeration tank nobo cu mester a costa Afl. 12.5 miyon, cual no a wordo inverti e tempo ey, y asina pone mas presion riba e planta di Bubali.
Na 2015 mester a haci un mantenimento urgente na e planta pa Afl. 1 miyon.
Na 2017 TNO Caribbean a bolbe recomenda pa cumpra un aeration tank nobo pa Afl. 13 miyon.
Na 2018 a recomenda pa cumpra ekipo y parts.
Na 2019 a recomenda pa haci un mantenimento critico di ful e planta.
Na 2020 a inverti Afl. 3.6 miyon pa algun parts esencial pa e planta. Adicionalmente, entre 2021-2022 a haci inversion di Afl. 3.6 miyon y Afl. 830 mil den e planta di Bubali.
Un planta nobo cu un capacidad mas grandi.
Aunke cu pais Aruba ta den un periodo di recuperacion, gobierno a pone prioridad y maximo urgencia pa bini cu un plan pa cuminsa solucion tur loke tin di haci cu e awa sushi, nos sistema di riool cu ta masha anticua y den mal estado, y e kimamento di cierto tipo di sushi cu e incinerator. E capacidad di a planta nobo na Bubali lo ta 16.000 m3. Actualmente na Bubali Plas ta drentando mas o menos 9.000m3 di awa sushi. Gobierno a subi e capacidad di e planta nobo mirando ainda tin hotel pa habri y pe tin capacidad suficiente pa procesa e awa sushi segun e standardnan internacional. Si tur cos bay bon, e construccion di e planta lo por wordo concretisa den 2-3 aña. E lo ta un planta moderno cu e ultimo tecnologia.
Den conclusion, mi ta contento cu finalmente e ley a yega Parlamento y cu Aruba lo bay conoce pronto un planta nobo di RWZI y un entidad cu lo cuminsa modernisa e otro plantanan, upgrade nos sistema di riool y soluciona e kimamento di cierto tipo di sushi cu e incinerator. E debatenan den e reunion publico lo ta interesante y pueblo lo por wak tambe kende ta sostene e solucion importante aki pa pais Aruba.
