Reunion cu AWSS ta mustra cu capacidad di plantanan manera Bubali y Parkietenbos a subi significativamente

Parlamentario John Hart di AVP:

ORANJESTAD (AAN):  Miembro di Parlamento pa AVP, Sr. John Hart, a enfatisa cu Aruba ta na un momento decisivo den e maneho di nos sistema di purificacion di awa di riool, e Rioolwaterzuiverinstallatie (RWZI). Tras di nos paisahe bunita di lama, solo y turismo, ta existi un reto structural importante den e maneho di e instalacionnan aki, unda Aruba Wastewater Sustainable Solutions (AWSS N.V.) tin un rol crucial.

   Segun Hart, e situacion aki no ta solamente un reto tecnico, sino un reto ambiental cu ta impacta salubridad publico, nos industria turistico, nos economia y, mas importante ainda, e bienestar di nos poblacion.

   E parlamentario di AVP a indica cu ora cu habitantenan di Cas Paloma y e bisindario rond di Parkietenbos a expresa nan preocupacion y a presenta keho tocante molester di holo fuerte, Parlamento di Aruba mester scucha seriamente y tuma accion responsabel. P’esey, su persona, hunto cu otro miembronan di Parlamento, a solicita un reunion cu e minister responsabel, Arthur Dowers, pa atende e situacion di RWZI y pa busca solucion pa habitantenan di Parkietenbos cu ta sufri molester di holo causa pa e sludge (slib) cu no ta seca suficiente despues di e proceso di purificacion na e planta di Bubali.

Durante e reunion, AWSS a splica cu door di rabounan di mantencion cu ta tumando lugar actualmente, e sludge ta contene mas awa cu normal ora cu ta transport’e pa Parkietenbos.

   Consecuentemente, mester haci un proceso adicional pa comprimi e material cu ta yega na e planta di Parkietenbos pa elimina mas awa posibel y logra un estado mas seco. Sin embargo, e instalacion na Parkietenbos ta un planta anticua y habri, loke ta contribui na emision di holo, principalmente procedente di e awa cu ta separa for di e sludge, cu normalmente lo a yega eynan caba den un condicion mas seco.

   Un punto importante cu a resalta durante e reunion publico ta e herencia administrativo cu e gobierno nobo a ricibi: un organizacion cu falta di maneho efectivo, ausencia di direccion strategico, uzo inapropia di fondonan y falta di control interno. Durante e reunion, Parlamentario Hart a haci pregunta na minister tocante e maneho nobo, considerando cu e maneho anterior a ricibi critica serio di parti di Colegio di Supervision Financiero di Aruba (CAft).

   Aña pasa, den un ongevraagd advies di CAft na Gobierno, a indica cu e empresa estatal AWSS N.V. a cera un prestamo innecesariamente caro riba e mercado liber. Segun CAft, esaki ta causa cu Pais Aruba por paga te casi 200 miyon Florin den gasto adicional innecesario. CAft tambe a expresa duda serio tocante e manera con AWSS N.V. tabata maneha su asuntonan financiero. P’esey, Hart a puntra minister kico ta e plan di maneho y vision nobo basa riba e criticanan preocupante di CAft.

   E parlamentario a señala cu na 2024, e situacion operacional tabata critico. E planta na Bubali tabata funciona na solamente 35% di su capacidad, Parkietenbos na 0%, Zeewijk na 65% y e incinerator na 25%. Awe, e resultadonan ta mustra progreso concreto: Bubali ta opera na aproximadamente 65% di su capacidad, Parkietenbos a subi te 90%, Zeewijk a keda stabiel na 65% y e insinerado ta sigui opera na 25%, mientras cu ainda tin cu atende un acumulacion di desperdicio medico cu a keda atras pa mas cu un aña.

   Ademas, e maneho nobo a inicia cambionan drastico pa restaura ordo, transparencia y eficiencia den e organizacion. A inverti den personal, infrastructura y tecnologia, incluyendo modernisacion di e insinerado y mehoracion di facilidadnan existente.

   Segun Hart, aunke e operacion tabata den un estado critico na 2024, awe tin progreso evidente. Sin embargo, e reunion publico a confirma cu tabata existi falta di maneho, ausencia di un cuadro strategico cla, dependencia di un solo fuente financiero y maneho presupuestario inapropia. Ademas, no tabata existi sistema di control interno adecua, ni mecanismo di whistleblower ni cumplimento etico, loke a aumenta significativamente e riesgonan pa AWSS y su resiliencia operacional.

   “E reunion aki ta sumamente importante pa hiba e debate publico tocante e futuro di AWSS. Cambio di direccion den e maneho di AWSS awe ta produci resultado pa mitiga e deficiencianan identifica y pone un base structural solido pa e futuro. Mi rol como parlamentario ta pa controla gobierno su maneho, y pa mi ta esencial cu tin transparencia den Parlamento tocante e maneho di AWSS, un sector fundamental pa garantisa un servicio di utilidad publico fuerte, sostenibel y confiabel. Gobierno tin un responsabilidad pa cuida entidadnan vital y fondonan di nos pais, y como parlamentario, pa mi ta importante pa supervisa e maneho cu ta wordo hiba,” señor John Hart a conclui.