Accident fuerte den Schotlandstraat a finalisa cu impacto contra compania ASD

ORANJESTAD (AAN): Un accident fuerte a socede Diasabra atardi banda di 3:30 pm, net na e T-weg di Schotlandstraat cu Caya Soeur Dionysia,

cu ta net dilanti e tereno di compania Aruba Supplies & Distribution (ASD) na Schotlandstraat 73.

   Prome yamadanan cu a drenta na Polis ta indica cu ta trata di un accident grave, y cu lo tin un hende pega den auto.  Pesey a notifica Centro di Alarma pa manda Vehiculo di Rescate eynan tambe.

   Un vehiculo SUV Chevrolet Captiva color bruin scur, a sali for di Caya Soeur Dionysia sin duna preferencia y a bay dal den banda di un Mitsubishi Lancer color blanco cu tabata bayendo nort.  Tin di investiga si acaso e chauffeur di e Chevrolet a bruha y envez di primi pedal di brake, a keda primi e pedal di trot.

   El a dal, y pusha violentamente e Mitsubishi Lancer contra e sliding door grandi di hero cu ta cera e cura di ASD.  Despues di a pusha e Lancer contra e cura, e Captiva a keda sigui pusha bay lastra full e porta pisa aki di hero, hal’e un banda, y finalmente bay impacta fuerte contra un Container cu ta staciona riba tereno di e compania.  Aki ta unda cu porfin a primi brake y stop.

   Bon mes cu e momento ey ya caba ASD a cera (desde 12:00 pm), cu no tabatin hende riba tereno.

   E impacto tabata asina duro cu e porta di slide di hero di e compania a wordo kibra manda paden.

   Ora cu Ambulance a yega, por a mira cu e chauffeur di e Mitsubishi Lancer riba su mesun forza a sali cana bay na e Ambulance pa Paramediconan atende.  Pues e no tabata pega, y milagrosamente a sali menos herida di loke e impacto tabata mustra.

   Polis di trafico a presenta y hunto cu Forensys ta cuminsa nan investigacion, aunke cu e ta basta claro ta kico a socede.  Gastonan ta basta grandi aki.